Баянзүрх дүүргийн онцгой комиссоос цаг үеийн асуудлаар мэдээлэл хийлээ.

Баянзүрх дүүргийн Эрүүл мэндийн нэгдлийн дарга Ж.Энхзул “Баянзүрх дүүрэгт коронавирусний батлагдсан тохиолдол 90 болоод байна. Үүний 75 нь дүүргийн нэгдсэн эмнэлэгийн голомтод гарсан. Халдварын тоо энэ долоо хоногт огцом нэмэгдсэн.

Баянзүрх дүүргийн нэгдсэн эмнэлгийн голомтод байсан эмнэлгийн мэргэжилтнүүд тусгаарлагдсан. Хамгаалалтад байгаа. Голомтолсон халдвар одоогоор тодорхойлогдоогүй байна.

Үүнээс өмнө дүүргийн хэмжээнд 28 тохиолдол байсан. Анх бүртгэгдсэн “Хархан нүдэн” тоглолт үзсэн, караоке орсон голомтоос авсан халдварууд байсан. Дүүргийнхээ тохиолдлуудыг голомт дээр нь хумьсан байсан.

Арваннэгдүгээр сарын 11-ээс хойш дүүргийн хэмжээнд 56 мянган иргэн шинжилгээнд хамрагдсан байна. Эдгээрийн дийлэнхийг шинжилгээний цэгүүд дээр, 30 хувийг нь айл өрхүүдээр явж голомтод хийсэн шинжилгээ. Нэмж голом гараагүй байсан гэдэг нь дүүргийн зүгээс авч хэрэгжүүлсэн арга хэмжээ байлаа.

Одоо үүссэн нөхцөл байдалтай холбогдуулан массын шинжилгээ хийх гэж байна. 90 мянган хүн шинжлүүлнэ гэсэн тооцоо гарсан.

Тухайн хороонд ойрхон байрлалтай цэгүүдэд шинжилгээ өгнө.

Ингэхдээ 16-аас дээш насны өөрийгөө эрсдэлтэй гэж үзэж байгаа иргэд өгнө. Энэ нь нэмж голомт гарахаас сэргийлэх зорилготой бөгөөд долоо хоног үргэлжилнэ. Иймд гэрээсээ эрсдэлтэй гэж бодсон хүнээ хамруулах хэрэгтэй байна. Иргэнийхээ үүргийг биеүүлж, иргэнийхээ үнэмлэхтэйгээ өөрт ойр сургууль дээрээ шинжилгээндээ идэвхтэй хамрагдах”-ыг уриаллаа.

А.Сүх