Гамшгийн бэлэн байдлын зэрэгт шилжсэн 14 хоногийн хугацаанд шар айраг, дарс зэрэг 18 градусаас доош согтууруулах ундаа худалдан борлуулахыг хориглохгүй байх шийдвэрийг НОК-оос гаргасан нь шагчдад хүнд “цохилт” болов.

Хатуу хөл хорио тогтоох тухай мэдээлэлтэй зэрэгцэн олон нийтийн сүлжээнд иргэд шар айраг, дарс ихээр нөөцлөж байгаа тухай мэдээлэл гарч, шүүмжлэл дагуулсан. Үнэхээр ч зарим дэлгүүрийн лангуун дээрх шар айраг, дарс дууссан байсан нь нууц биш.

Иргэд үнэхээр хэрэгцээндээ зориулж их хэмжээгээр худалдан авч байсан уу эсвэл дамлан худалдаалахыг санаархаж байв уу гэдэг нь эргэлзээтэй.

Өмнө нь хатуу, хөл хорио тогтоосон хугацаанд архи, согтууруулах ундаа худалдан борлуулсан 430 зөрчлийг цагдаагийн байгууллага илрүүлэн, шалгаж байгаа талаар Нийслэлийн цагдаагийн газрын дэд дарга И.Баттөгс мэдээлсэн билээ. 

Энэхүү мэдээллээс харахад их хэмжээгээр шар айраг, дарс нөөцөлсөн нь хууль бусаар дамлан худалдаалах гэсэн санаархал байхыг илтгэж байх шиг. Зарим эх сурвалжийн мэдээлж буйгаар их хэмжээгээр шар айраг, дарс хуралдан авсан хүмүүс тухайн бараагаа эргүүлэн өгөхөөр улайрч байгаа тухай мэдээлэл хөвөрч байна.

Нийслэлийн Онцгой комиссын гаргасан шар айраг, дарс худалдаалахыг хориглохгүй байх шийдвэр үнэхээр нүдээ олсон, шагчдад хүнд цохилт өгсөн шийдвэр байв.

Нийслэлийн Засаг даргын орлогч Ж.Сандагсүрэн “Өмнө нь архи согтууруулах ундаа худалдан борлуулахыг хориглосонтой холбоотойгоор нэлээд олон сөрөг үр дагавар гарч байсан. Тодруулбал, хууль бусаар согтууруулах ундаа худалдах, шаардлага хангахгүй, согтууруулах ундаа хэрэглэх зэрэг зөрчил ихээр гарсан. Тиймээс энэ удаа 18 градусаас доош хэмжээний согтууруулах ундаа худалдаалахыг зөвшөөрсөн. Харин ямар нэгэн сөрөг үр дагавар гарвал тухайн цаг тухайд нь зогсоох болно” гэдгийг онцолсон юм. Мөн тэрбээр өмнө нь бэлэн байдлын зэрэгт шилжиж, хөл хорио тогтоосон. Энэ хугацаанд иргэд ямар зан үйл хийх төлөвшилд суралцсан гэж ойлгож байгаа. Ер нь иргэдийнхээ ухамсарт найдаж байна гэдгийг хэлсэн юм.

Ямартай ч энэ удаад НОК шагчдад боломж олгоогүйд талархах хүн олон байна. 

Б.Баатар