Ерөнхий боловсролын сургуулийн сурагч охин өөрийн зурсан бүтээлээ борлуулж сайн үйлсийн аянд хандивласан тухай сонсоод энэ тухай уншигчдадаа хүргэхээр шийдсэн юм. Сайн үйлсийн эзэн охиныг Б.Хулан гэдэг бөгөөд “Улаанбаатар Эмпати” сургуулийн 9B ангид сурдаг ажээ.

-Ойрын үед сонссон хамгийн сайхан мэдээллийн эзнийг хайж олсондоо баяртай байна. Эхлээд хоёулаа танилцах уу?

-Намайг Баянмөнхийн Хулан гэдэг. Би “Улаанбаатар Эмпати” сургуулийн 9В ангид сурдаг.

-Хавдрын үндэсний зөвлөлийн пэйж хуудаснаас дунд сургуулийн сурагч охин өөрийн зурсан зурагаа борлуулж түүнийгээ тус төвд хандивласан тухай уншаад маш их бахархлаа. “Байгаль эх” цуврал зураг бүтсэн түүхээс манай уншигчдад танилцуулна уу?

-Миний сурдаг байсан “Fast Academу”-ийн захирал Ерболат багш захиалж зуруулсан юм. Тэгээд багш маань цуврал зургийг хамтад нь, мөн 1 сая төгрөгийн хамт Академийнхаа зүгээс Хавдрын үндэсний зөвлөлд хандивласан. Миний дэмждэг байгууллагыг санаачилга гарган дэмжсэн багшдаа баярласнаа илэрхийлье. Анх хоёр жилийн өмнө “Арти Коур” галлерейн зураач, Жааханхүү багш маань цуврал зураг зурах тухай санаа өгсөн. Тэгээд “Байгаль эх” гэдэг сэдэв өгөөд тэр сэдвийн дагуу судалгаа хийж зурсан.

-Энэ бүтээлээрээ ямар агуулгыг илэрхийлэхийг хүссэн бэ. Маш сайхан Монгол эхийг дүрсэлсэн бүтээл байсан?

-Энэ цуврал зургаараа байгаль дэлхийг эмэгтэй хүнээр төлөөлүүлсэн бөгөөд эх дэлхийгээ хайрлах ёстой гэдэг санааг энэ үзэсгэлэнтэй ээжээр дүрсэлсэн.

-Хулан хэдэн настайгаасаа зурж эхлэсэн бэ?

-Анх 4 настай байхдаа ээжтэйгээ цуг ахыгаа зургийн дугуйланд хүргэж, өгч авдаг байсан. Тэр үед ахынхаа зурж байхыг хараад зураг зурах дуртай болж, зурж эхэлсэн.

-Ярилцлага хийхээр төлөвлөөд чиний тухай мэдээлэлтэй болох гээд жаахан судлалаа. Өнгөрсөн жилийн өдийд бие даасан үзэсгэлэнгээ гаргаж байсан юм байна. “Хулангийн ертөнцөөр” нэртэй үзэсгэлэнгийн зургууд үнэхээр таалагдлаа. Хулан ер нь зургийн ямар техник илүү ашигладаг вэ? Бие даасан үзэсгэлэнгийн зургуудаа ихэвчлэн Монгол зургийн аргаар зурсан байх шиг байсан.

-Зурах эрдэмд суралцаж байгаа тул зургийн бүх төрлөөр оролддог түүн дотроос Монгол зургийн аргаар илүү хичээнгүйлэн суралцаж, судалж байгаа. Анхны бие даасан үзэсгэлэн тул өөрийнхөө дотоод ертөнцийг зургаар илэрхийлсэн бөгөөд үзэсгэлэнгээ “Хулангийн ертөнцөөр” гэж нэрлэсэн юм.

-Акрилик, тосон будгийн бүтээлүүд чинь маш тансаг юм билээ. Усан будгаар бүтээл туурвидаг уу?

-Зургуудаа зургийн бүхий л төрлийн хэрэгслээр зурдаг. Гэхдээ усан будаг арай илүү хүнд санагддаг. Усан будгийн техникийг сайн эзэмшихийн тулд үе үе усан будгаар зурах гэж оролддог. Маш их дадлага хэрэгтэй.

-Ах нь бас дөрвөн настайгаасаа зурж эхлэсэн, долоодугаар ангидаа үзэсгэлэн гаргаж байсан хүү байна лээ. Чамайг зураач болоход, зурагт дурлахад хамгийн их нөлөөлсөн хүн нь ах нь уу?

-Тийм. Ах маань байнга зураг зурдаг байсан, тэгээд ахыгаа дууриаж зурсаар байгаад зурагт дуртай болсон.  Ээж маань ах бид хоёрын зурсан бүх зургуудыг гэрийнхээ ханан дээр өлгөдөг, манайх яг л уран зургийн галлерей шиг байдаг байсан. Одоо ч тийм. Энэ бүхэн зураг зурах хүслийг минь улам бадраадаг байсан байх аа.

-Ийм сайхан авьяастай хүүхдүүд өөрсдийн бүтээлээ борлуулж сайн дурын ажил хийдгийг сонсоод би маш их бахархлаа. Залуу үе, өсвөр насныхан үнэхээр гэрэлтэй ирээдүйг бүтээж чадах юм байна гэсэн итгэл төрж байна. Ах нь цусны хавдартай хүүгийн тухай “Хавдрыг даван туулсан Болд хүүгийн түүх” номын зургийг зуржээ. Энэ бүтээл хүүхдүүдийн дунд элбэг тохиолддог цусны хавдрыг ялан дийлэх урам зориг тэр өвчнөөр өвдсөн хүүхдүүдэд өгсөн байх гэж итгэж байна. Ер нь сайн дурын ийм ажилд хэзээнээс гар бие оролцож эхлэсэн бэ?

-Би “Арти Коур” уран зургийн галлерейн сурагч. Намайг 9 настай байхаас эхлэн манай галлерейн багш нар бидэнд зураг хэрхэн зурахыг заахаас гадна сурагчдаа сайн дурын үйл ажиллагааг хийхийг уриалж, дэмждэг, хамт хийдэг байсан. Багш нараа дагаж асрамжийн цэцэрлэг болон Улаанчулуутын хогийн цэгт байдаг цэцэрлэгийн ханан дээр зураг зурах гэх мэт ажлуудыг хийж байсан.

Мөн манай өвөө, эмээ хоёр хүнд их тус хүргэдэг, тусч хүмүүс байдаг. Ээж маань ч гэсэн хийж байгаа ажлаараа маш олон хүнд тус хүргэдэг. Олон хүмүүс ээжид маань баярлаж, талархаж байгаагаа илэрхийлж байгааг ах бид хоёр хардаг. Энэ бүхнээс л хийж байгаа зүйлээрээ хүнд тусалж болно гэдгийг ойлгосон. Ээж маань ах бид хоёрыг хүмүүнлэгийн ажил хийхийг үргэлж дэмждэг. Ээж маань хүнд туслахад заавал их мөнгөтэй, баян байх албагүй байгаа зүйлээрээ, юу чаддагаараа тусалж болно гэдэг.

-Өнгөрсөн жил мөн л өөрийн зурсан зургаа борлуулж 800 мянган төгрөгийн хандивыг Хавдрын үндэсний зөвлөлд хандивлаж байсан юм билээ. Тэр зургийн түүхээс хуваалцаж болох уу?

-Өнгөрсөн жил үзэсгэлэнгээ гаргахдаа заавал нэг буянтай сайхан зүйл хийе гэж ярилцаад, үзэсгэлэнгийн нээлт дээрээ “Байгаль эх” цуврал зургаа дуудлага худалдаагаар 1 сая төгрөгөөр зараад 200 мянган төгрөгийг нь өөртөө үлдээгээд 800 мянган төгрөгийг нь хандивласан юм.

“Байгаль эх” гэдэг энэ цуврал зургаа би 3 дахь удаагаа зурж байна. Анхны цуврал зургийг нэг бясалгал хийдэг эгч худалдаж авсан, 2 дахь хувилбарыг дуудлага худалдаагаар зарж 3 өөр хүнд очсон тул Ерболат багш маань хамтад нь нэг газарт байлгая гээд надад захиалж, би 3 дахь удаагаа зурсан юм. Ийм  түүхтэй зураг.

-Яагаад Хавдрын үндэсний зөвлөлийг сонгож хандив өргөдөг юм бол?

-Өнөөдөр дэлхий дээр хавдар өвчнөөр маш олон хүн өвчилж, нас барж байна. Нэгэнт хавдар туссан бол эдгэрэх маш хэцүү байдаг гэсэн. Ийм хүнд өвчтэй, хөдөө орон нутгаас ирсэн хүмүүс хотод байрлах газар байхгүйгээс хүнд байдалд ордог. Ийм хүнд асуудалтай хүмүүсийг тав тухтай нөхцөлд байлгаж, асран хамгаалж байдаг Цэцэгсайхан гэдэг эмч эгчийн байгуулсан “Дарь эхийн өргөө” гэдэг буянтай газрын тухай ээж минь яриад бид энэ газарт туслахаар шийдсэн юм. Мөн өөрсдөө туслаад зогсохгүй бусад хүсүүсийг ч гэсэн энэ төвд туслахыг уриалдаг.

-Багш нар нь, гэр бүлийнхэн нь сайн дурын ажил хийхэд чинь үргэлж дэмждэг үү?

-Тийм ээ, дэмждэг. Ялангуяа ээж маань бүхий л талаас нь дэмждэг. Ээж маань хэрэгтэй үедээ хэрэгтэй хүн бай гэж үргэлж хэлдэг.

-“Хулангийн ертөнцөөр” хамтдаа аялж болох уу? Жишээлбэл чиний мөрөөдөл юу вэ?

-Миний мөрөөдөл бол өөрийнхөөрөө байж, хүссэн зүйлээ бүтээж чаддаг үнэ цэнтэй хүн байх. Урлагийн боловсролыг нийгэмдээ хөгжүүлэхэд хувь нэмрээ оруулсан хүн болох мөрөөдөлтэй.

-Ахлах ангийн сурагч Хулан, артист Хулан хоёрын араншин ер нь хэр өөр вэ?

-Маш их ялгаатай. Сурагч Хулан бол нийтэч, нээлттэй, сахилгагүй, эршүүд, чөлөөтэй хүүхэд. Зураач Хулан болохоор маш дотогшоо, сэтгэл хөдлөлөө гадагшаа гаргадаггүй, гүн төвлөрч юм боддог чимээгүй хүн. Ээж маань надад зураг зурах үедээ их өөр хүн болох юм аа гэж хэлж байсан. Жинхэнэ Хулан бол зураач Хулан болов уу гэж бодож байна. /Инээв/

-Зураг зураад суухдаа чи дандаа жаргалтай мэдрэмжтэй байдаг уу, эсвэл хөнгөн гунигласан үедээ ч юм уу илүү бүтээлч ажилладаг уу?

-Энэ сонин асуулт байна. Энэ асуултанд тодорхой хариулж чадахгүй нь. Зураг зурж байх үедээ би жаргалтай байгаа, эсвэл гунигтай байгаагаа анзаардаггүй зөвхөн зурагныхаа тухай л боддог.

-Ярилцсанд баярлалаа. Сайн үйлсийн ажилд нь, сурлагад нь амжилт хүсье. Мундаг зураач болоорой.

-Баярлалаа.

П.Тамир