Коронавирусний халдварыг дотооддоо алдсан, эмнэлгүүд халдвар хамгааллын дэглэм баримтлаагүйгээс цар тахал газар авч байна зэрэг шалтгаанаар нэр бүхий хүмүүст хариуцлага тооцох тухай асуудал хүчтэй яригдаж эхлэв. Тодотговол, Эрүүл мэндийн сайд Т.Мөнхсайхан, ХӨСҮТ-ийн захирал Д.Нямхүү нарын хэн нь хариуцлага хүлээх ёстой вэ гэх асуулт хариултаа нэхэж, элдэв таагүй мэдээлэл хөвөрч эхэллээ.

Дотоодын халдвар өдрөөс өдөрт нэмэгдэж, голомтын цар хүрээ өргөжсөөр байгаа энэ үед хэн нэгнийг суудлаас нь буулгаж, халаа сэлгээ хийлээ гээд нөхцөл байдал намжихгүй нь тодорхой.

Шадар сайд Я.Содбаатар ч “Хэн нэгэнд хариуцлага тооцох өдөр бидэнд олдоно. Одоо хамгийн гол анхаарал хандуулах асуудал бол коронавирусний цар тахлын голомтыг хумих, хавьтлыг олж тогтоох явдал” гэж хэлсэн удаатай.

Дан ганц манай улсыг ч биш дэлхий нийтийг донсолгож буй коронавирусний цар тахлыг хумихад хүн бүрийн хүчин чадал, эв нэгдэл хэрэгтэй. Тэр ч бүү хэл салбар, яамаа мэддэг мэргэжлийн хүмүүсийн ур чадвар, мэдлэг боловсрол чухал шаардлагатай гэдэгтэй маргах хүн үгүй биз.

Гэтэл өдгөө сандал суудлын төлөөх тэмцэл чимээгүй өрнөж, нэгнийхээ улыг шагайж эхэлсэн нь харамсалтай.

Шадар сайдын хэлсэнчлэн хариуцлага тооцох цаг олдох нь дамжиггүй. Мэдээж хэн хариуцлага алдсан, хэн гавьяа байгуулсан нь олны өмнө ил байгаа. Үүнийг ч хууль хяналтын байгууллага олж тогтоон, хариуцлага хүлээлгэх нь дамжиггүй. Гэхдээ цаг нь одоо биш.  

Б.Баатар