Эрүүл мэндийн байгууллагууд өдгөө коронавирусний гол халдвар тараагч болоод байна. Эмнэлгүүд эрсдэлтэй орчин болж, өнөөдрийн байдлаар Баянзүрх дүүргийн нэгдсэн эмнэлэг, ХӨСҮТ, Хавдар судлалын үндэсний төв, Цэргийн төв госпиталын эмч, эмнэлгийн ажилтнууд болон өвчтөнүүдээс халдвар илэрч, голомтлон тархаж эхэлсэн.

Үүнтэй зэрэгцэн салбарынх нь сайд, ХӨСҮТ-ийн захирал нар хоорондоо үл ойлголцон тэрсэлдэж эхэлсэн бол бүтцийн өөрчлөлт нэрийдлээр халаа сэлгээ хийсэн зэрэг энэ салбар ихээхэн бужигнаантай байна.

Мөн иргэдийн шүүмжлэл ч их байна. Харин энэ дунд нэг л хүн нам гүмхэн, бараа нь ч үзэгдэхгүй, дуу нь ч гарахгүй суугаа нь Эрүүл мэндийн дэд сайд Ш.Анхмаа юм.

Сайд нь чуулганы танхимд чичлүүлж суухад ч тэр сураггүй. Салбарынх нь тэмцэл дотроосоо хальж, нийгмийн анхаарал татсан ч, томоохон эмнэлгүүдэд цар тахал дэгдэн эмч, ажилтнууд нь олноороо халдвар авч салбар дэнжигнэж байхад ч дэд сайдын сураг ч гарсангүй.

Эрүүл мэндийн дэд сайдын албан тушаалд томилогдсоноосоо хойш хэд хэдэн аймагт шалгалтаар яваа сураг гарсан.

Ш.Анхмаагийн хувьд НИТХ-ын төлөөлөгч, Нийслэлийн Засаг даргын хүний хөгжил, нийгмийн бодлогын асуудал хариуцсан орлогчоор ажиллаж байхдаа олны өмнө их харагддаг байж дээ.

 Харин өдгөө олны нүднээс далд суугаа нь дэд сайдынх нь ажил түүнд ахдав уу, эсвэл арын фронтод гол үүрэг гүйцэтгэж байгаа юу, аль нэг нь л байж таарна.

У.Тэргэл