Сайн байцгаана уу,

Монголын ард түмэндээ энэ өдрийн мэнд хүргэе. Намайг Б. Отгонжаргал гэдэг, 31 настай. Нөхөр, 4 настай хүүгийн хамт амьдардаг. Миний бие ясны хавдар хэмээх өвчинөөр Монголд 2 удаа хагалгаанд орсон ч 3 дахиа дахиж  Монголд эмчлэх боломжгүй гэсэн заалттай  БНСУ-д хими эмчилгээ хийлгэж байгаа юм. Гэртээ өөрөө өөртөө өвчин намдаах тариа хийж байснаа бодоход солонгост эмнэлэгтээ ирээд  3 сар орчим болж байна. Төлбөр мөнгө нь л байвал эмчилгээ үйлчилгээ, сувилгаа үнэхээр сайн юм. Судас олдохгүй бүтэн цаг нухаж судас хагараад эсвэл судас нь олдохгүй цусандаа хутгалдаж тариагаа ч хийж чадалгүй, өвчнөө ч намдааж чадалгүй уйлаад суудаг байсан бол энд ирээд хиймэл судас суулгуулж ямарч зовлонгүй тариагаа хийлгэж эмчийн хяналтанд, өөр хүнд өөрийгөө даатгаж өөрийгөө бага ч болов чөлөөлөөд байна. Миний захидал,  ярилцлагыг нийтэлж, хандивын аяныг минь олонд хүргэхэд туслалцаа үзүүлсэн сайтууд, телевизүүдэд маш их баярлаж байгаагаа илэрхийлье.

Та бүхнийхээ хандив тусаар 3 удаагийн хими эмчилгээнд амжилттай ороод биеийн байдал маань өдрөөс өдөрт дээрдэж байна. Энд ирээд 14 хоногийн тусгаарлалт дуусахаас өмнө өвчин намдаах тарианы хордлого, хоол тэжээлийн дутагдал, өвчин намдахгүй зэрэг хүндрэлүүдээс болж  яаралтай түргэн тусламжаар эмнэлэгтээ хүргэгдэн ирж 8 хоногийн турш эрчимт эмчилгээнд орсон.  Хавдар өдрөөс өдөрт томорч байсан тул хими эмчилгээндээ  хурдан орохыг хүсч байсан  ч эрчимт эмчилгээнээс гараад бие маань сайн дээрдэхгүй байсан тул шууд орж чадаагүй. Хэд хоног  хүлээсний эцэст эхний хими эмчилгээ биеийн байдлаас шалтгаалан 70%-тай хийсэн. Бага тунгаар хийсэн тул хордлого өгөх нь бага байсан ч маш их ядарч хуруугаа хөдөлгөх ч чадалгүй болсон байсан, харин 2 дахь эмчилгээнээс биеийн байдал дээрдсэн гэж үзэн 100% буюу бүрэн тунгаар хими эмчилгээ хийсэн. Гэтэл эмчилгээний 3 хоногт  хавдар ясандаа янгинан өвдөж, амьсгал давчдаж амьсгалахад ч хүндрэлтэй болж, хордлого ихээр өгч,  хоол унд идэж чадахгүй бөөлжис цутган маш хүнд болсон. Харин 5,6 дахь өдрөөс хордлого тайлагдан амьсгал уужирч юм идэх хүсэл сонирхол нэмэгдэн юм залгих боломжтой болж байна. Гэхдээ л өвчин намдаах эм тариаг 2-3 цагийн зайтай байнга л хийхгүй бол өвдөлт маш их хэвээрэй. Баяртай мэдээ гэвэл хоёр хоногийн өмнө шинжилгээнүүдээ өгөхөд шинжилгээний үзүүлэлтүүд сайжирсан хими эмчилгээний үр дүн бага боловч мэдэгдэж эхэлсэн байна. Тийм учраас өөрөөсөө илүүчлэн хандив өргөсөн сайхан сэтгэлт монгол түмэндээ мэнд яваагаа дуулгахаар ийнхүү захидал бичиж байгаа минь энэ. Хүнд хэцүү өдрүүдэд эрүүл болоод ирнээ гээд үлдээсэн хүүгээ л бодож зоригжиж байна. Надад туслаж дэмжиж сэтгэлийн дэм өгч байгаа сайхан сэтгэлт хүмүүст талархан, надаас дутахгүй зовж шаналж байгаа хайртай хүмүүсээ бодон залбирсаар байна. Талархалын хүчээр хайрын хүчээр бурхан намайг сонсож хүнд хэцүү үеэ өдөр өдрөөр даван туулсаар байна.

Монгол оронд минь аймшигт тахал халдаж ард түмэн та  бүхэн минь айдас түгшүүртэй байгаа ч Монгол түмний минь заяа буян их тул даваад гарна гэдэгт итгэлтэй байна. Та бүхэн минь дор бүрнээ хичээгээрэй. Эмчилгээний төлбөрийг минь олох гэж өөрсдөөсөө харамлан цуглуулаад явуулдаг байсан ах дүүсийн минь ажил төрөл зогсож, авах цалин байхгүй болж, авсан ажлаа ч гүйцэтгэж чадахгүй болсон тул эмчилгээний бус хэрэглээний төлбөрөө л арайхийж төлсөн. Энэ байдал хэдий хүртэл үргэлжлэхийг мэдэхгүй юм. Эмчилгээний явцад гарсан хүндрэлүүдээс болж тооцоолж байснаас өндөр  төлбөр гарсан, нэмэлт үйлчилгээ ч их авсан.

Ковид намайг олон удаа хясаж, эрүүл болох хүслийг минь унтраах гэсэн шиг саад болсонч бурхан миний талд байгаа тул намайг гэсэн хайртай хүмүүсийнхээ хайраар, ядарсан нэгнээ орхидоггүй сайхан сэтгэлт ард түмнийхээ буянаар би эмчилгээгээ сайн хийлгээд эрүүл болоод хүү дээрээ очноо.

Цар тахалтай хүнд хэцүү үеийг туулж байгаа та бүхнээсээ хандив гуйхаас зүрхшээж байгаач эмчилгээний төлбөргүй бол дараа дараагийн эмчилгээ зогсож, зовж зүдрэн байж энэ хүртэл даван туулсан бүхэн минь  дэмий зүйл болох тул надад туслаж чадах  нэгэнд хүртэл түгээж өгч,  тав, арав гэлтгүй хандивийн аянд минь нэгдэж өгөөч хэмээн та бүхнээсээ гуйж байна. Одоо эмчилгээний төлбөрөөс 78 сая төгрөг дутуу байгаа юм. Хүнээс юм гуйх нь эрүүл саруул, өөр хүнд ичмээр юм шиг боловч төрүүлсэн ганц үрийнхээ төлөө юу ч хийхэд бэлэн юуг ч даван туулахад бэлэн байгааг минь ойлгоорой. Надад тусласан бүхэндээ маш их баярлалаа.

Хандивын данс: 

Хаан банк- 5018066681 – Б. Отгонжаргал

Хаан банк $: 5400666275 – Б. Отгонжаргал

ХАНА БАНК 144-91064786107 Б. Нацагмаа (Солонгос дахь воны данс)

Холбоо барих: 77815335, 88991169, 01029538118