Хийж бүтээх хүсэл эрмэлзмээр дүүрэн үндэсний үйлдвэрлэл эрхэлдэг бүсгүйчүүдийг онцолдог “БҮТЭЭЛЧ ЭЭЖ” цувраллдаа “ХОНГОРЖИН” брэндийг үүсгэн байгуулагч дизайнер Э.Дөлгөөнийг урилаа.  Эмэгтэй хүний эрхэмсэг гоог илтгэсэн ихэмсэг энхрийхэн бүсгүйн бүтээл бүр тод өнгөний шийдлийг гоёл чимэглэлтэй хослуулан урласан нь түүний ертөнц тийм л чамин тансаг гэдгийг илтгэнэ. Ээж, охидын хос хувцсыг өнгө загварын өргөн сонголттой хийдэг “Хонгоржин” брэндийн түүхээр аялцгаая.

Хүүхэд насныхаа хүсэл мөрөөдлийг биелүүлж, хувцас загварын салбарт  өөрийн гэсэн өнгө төрхийг тодорхойлж, оршин тогтнож чадсан чадварлаг дизайнер Э.Дөлгөөн ирээдүйн амжилтын зүг итгэл төгс алхаж явна. Зураг зурах авьяастай  охин өвөрмөц шийдэлтэй хувцасны загварыг гаргаж, бүтээлч сэтгэхүйгээ хөгжүүлсээр долдугаар ангиасаа утас зүү шаглаж, үйл мэтгэж сурсан гэдэг.

“Дүрэмт хувцсаа янз бүрээр чимэглэн өмсөж, багшдаа их загнуулдаг сурагч байлаа. Хамгийн анх даашинз оёсон. Өөртөө зориулж хийсэн болоод ч тэр үү баярлаж бахархах сэтгэгдэл төрж байсан. Хананд өлгөсөн даашинзаа харахаар хайр хүрээд л. Хүсэл мөрөөдлөө биелүүлж чадсан гэж боддог” гэв.

Түүнийг дизайнер мэргэжлийг сонгож, суралцахад ээжийнх нь шийдвэр зөв зүг рүү хөтөлжээ. Урлагт дуртай учир жүжигчин болох нууцхан хүсэл түүний сэтгэлд байсан гэдэг. Тиймээс ээжтэйгээ ярилцаж, эргэлзээгээ тайлж, урлаж шаглах уран үйлсийн эзэн болох хүсэлдээ хөтлөгдөн ИЗОУИС-ийн хувцас загварын дизайнерын ангид элсэн суралцжээ. "Луужингаар илэрхийлбэл ээж миний амьдралын чиглүүлэгч хүч. Мэргэжлийнхээ сонголтыг хийж чадахгүй эргэлзээд ээжтэй ярилцаж шийдэлд хүрсэн” хэмээн инээмсэглэв.

Хонгоржин охинтой учирсан түүх

Оюутны он жилүүд хөвөрч, завгүй өдрүүд үргэлжилж, бүтээл туурвиж, өөрийгөө цаг тутамд хөгжүүлэхийг эрхэмлэдэг байсан тэрбээр нэгдүгээр курстээ “Хаврын Гоёл” наадамд авангард загвар урлаж, амжилттай оролцжээ. Энэ үе нь түүний сэтгэлд тод үлдсэн гэдэг. Ажиллагаа ихтэй авангард загвар сонгож, өдөр шөнөгүй оёж сургууль дээрээ олон хонож байсан гэнэ. “Сэтгэл зүтгэлээ зориулж, нойргүй хонож хийсэн бүтээлээ тайзан дээрээс харах л үгээр илэрхийлэхийн аргагүй сайхан мэдрэмж, торгон агшин” гэдгийг тэрбээр онцлон хэлж байсан юм. Хөлс хүчээ дуслуулж, хөдөлмөрөө шингээж урласан бүтээлийнхээ үнэ цэнийг салбарынхаа шилдгүүдэд үнэлүүлнэ гэдэг будаг нь ханхалсан шинэхэн оюутан охины урам зоригийг бадраасан биз.

Хоёрдугаар курстээ хорвоо ертөнцийн хамгийн үнэт эрдэнэ, энгэрийнхээ шигтгээг элгэндээ тэвэрч эх хүний жаргалыг эдэлсэн он цаг үргэлжилжээ. Тэр үеэс хичээлдээ явах нь ховордож, гэртээ практик дээр суралцаж эхэлжээ. “Охиноо төрүүлсэн үеэс хойш сургууль дээрээ өнгөрүүлсэн цаг хугацаа ховорхон байх. Ангийнхаа хүүхдүүдээс дутахгүйн тулд гэртээ өөрөө эсгүүр гарган оёж өөрийгөө хөгжүүлдэг байсан. Практик дадлага бол маш чухал. Дизайнер хүн үргэлж шинийг сэтгэж, хийж бүтээх хүслээр хөглөдөгдөж амьдардаг” гэлээ.

Их сургуулиа амжилттай төгссөж гэрийнхээ нэг өрөөг тохижуулж, ажилдаа ханцуй шамлан оржээ. Хорвоод хосгүй хонгорхон охиныхоо нэрээр брэндээ нэрлэсэн нь “Хонгоржин”. Хувцас загварын салбарт өрх тусгаарлаж, үүдээ нээсэн нь энэ. “Анх бол гэртээ үйлдвэрлэл хийж эхэлсэн. Шинэхэн төгсөгч намайг хөрөнгө санхүүгийн асуудал чөдөрлөж байсан. Гэхдээ хийж бүтээх хүслийг маань хэн ч унтрааж чадахгүй. Ганцаараа өрөөндөө ажлаа хийгээд өдөржин сууна. Гэр бүлийнхнийхээ дэмжлэгээр ажлаа өргөжүүлж, урлангаа нээсэн. Ээж болон найзаасаа санхүүгийн дэмжлэг авч байлаа” гэсэн юм.

Э.Дөлгөөн урлангаа гурван сая төгрөгийн санхүүжилтээр нээжээ. Тодруулбал, ажлын байрны түрээс, засвар тохижилтын зардал, түүхий эд материалаа худалдаж авчээ. Үйлчин хүний үнэнч зэмсэг бол оёдлын машин. “Онц” дүнтэй төгссөн охиноо ээж нь шагнаж, “Ирээдүйд их үйлс бүтээгээрэй” хэмээн ерөөн хоёр оёдлын машин авч өгсөн нь түүний амьдралд оруулсан томоохон хөрөнгө оруулалт.

Ээжийнхээ энэ хүслийг зүтгэлээр хариулж, өдгөө өөрийн гэсэн үйлчлүүлэгчтэй болж чамин тансаг хувцас урладгаараа хэдийнэ танигдаж чадсан нь Э.Дөлгөөний хөлс дуслуулж, хөдөлмөрлөсний гавьяа. Эхийн цагаан сэтгэлээр үрдээ ерөөлөө хайрласан ээжийн хүсэл биелэлээ олж, охиноороо бахархаж суугаа нь дамжиггүй биз ээ.

                                “Хонгоржин”брэнд хос хувцас урладаг

“Хонгоржин” брэнд хос хувцсыг өнгө загварын өргөн сонголттой чамин тансаг бүтээлээр урладаг. Охин үрээ өлгийдөж авсан эх хүн бүхний хүсэл гоёж гангалах. Тиймдээ ч бяцхан охиндоо зориулж хувцас урлахыг эрхэмлэдэг байсан гэнэ. Энэ талаар “Эхлээд цор ганц загварыг хувцсыг охиндоо зориулж оёдог байлаа. Дараа нь охинтойгоо хослож өмсөх зорилгоор хос загвар гаргасан” гэв. Тус брэндийн дэлгүүрт ороход гялалзаж, гялтагнасан тансаг орчин таныг угтана. Учир нь, тод өнгөний шийдлийг гоёл чимэглэлтэй хослуулсан коллекцийг улирал тутамд гаргадаг нь түүний онцлог. Одоогоор 20 гаруй нэр төрлийн бүтээгдэхүүн гаргажээ.

Анх брэндээ нээхдээ хувцасны үнэлгээ өндөр байсан гэнэ. “Анх бол урласан хувцсаа нэлээд өндөр өртөгтэй худалдаанд гаргадаг байлаа. Ажил хийх тусам арга барилаа олж, салбараа хүртэл сайн судлах шаардлага тулгарсан. Тэр ч бүү хэл иргэдийн амьжиргаанд суурилж үнэлгээ гаргах нь чухалыг ойлгосон. Загвар гаргахдаа хүмүүст таалагдах болов уу гэж ерөөсөө бодож үздэггүй. Өөрт таалагдсан загвараа гаргадаг” гэв.

Үндэсний үйлдвэрлэл эрхэлж брэнд бүтээж буй бүсгүйчүүдэд тулгардаг асуудлын нэг нь түүхий эд, материал. Монгол Улс үйлдвэрлэгч орон биш учир импортоор оруулж ирсэн материал худалдаж авдаг. “Материалын олдоц үнэхээр хүндрэлтэй. Хүмүүст таалагдсан гоё загвар гаргаад дахин үйлдвэрлэх гэхээр материал нь дуусчихсан. Дахиж ирдэггүй. Өдрөөс өдөрт өргөн хэрэглээний бараа бүтээгдэхүүний үнэ өсч байна. Үндэсний үйлдвэрлэлээ хөгжүүлэхэд иргэн бүрийн оролцоо чухал.

Э.Дөлгөөний ажил өглөө нарнаас үдшийн бүрий хүртэл үргэлжилнэ. Хэдэн метр даавууг хүний сэтгэлд нийцтэл урлана гэдэг тухайн хүнээс ухааны цар, урлагийн мэдрэмж, ур дүйг шаардана. “Метрийн даавууг бүхэл бүтэн өмсөж болох бүтээл болгоно гэдэг гайхамшиг. Үйлчлүүлэгчдийнхээ сэтгэлд нийцсэн хувцас оёчихоод “Үнэхээр гоё болжээ. Баярлалаа” гэх үгийг сонсоод өөрийгөө  эрч хүчээр цэнэглэж, илүү сайн бүтээл урлахыг хичээдэг” гэв. Ажилдаа чин сэтгэлээсээ хандахыг эрхэмлэж ажилладаг тэрбээр захиалагч бүрийнхээ хувцсыг өөртөө зориулж хийж байгаа гэж бодон, чин сэтгэлээ шингээж оёдог гэнэ. “Хүн болсон хойно алдаа дутагдал гаргана. Загнуулж, зэмлүүлнэ. Залуу хүн үг сонсч сурах хэрэгтэй. Мэргэжилдээ чин сэтгэлээсээ дуртай болохоор алдаагаа ухамсарлаад л ажиллаж эхэлдэг дээ” гэлээ.

Эмээгийн оёдлын машинаар ирээдүйн ажлынхаа зураглалыг гаргасан ихэмсэг бүсгүйн хайраа шингээж урладаг хос хувцасны “Хонгоржин” брэнд айлаар яривал зургаан ам бүлтэй аж төрж байна. Амжилт ололт, алдаа оноогоо дүгнэж, өдөр өнгөрөх тусам өөрийн брэндийг хөгжүүлэхийг зорьж буй бүсгүйг гялтагнасан алтан шаргал өнгөнд дуртай хэмээх бүсгүйн туйлын хүсэл эх орондоо тэргүүлэх томоохон хэмжээний үндэсний үйлдвэрүүдийн нэг болохыг зорьж ажиллаж байна.

Цас бороо нар салхи цаг хугацаатай уралдан урагшилж хүмүүний амьдралын хуудсанд өөрийн гэсэн өнгө аястай түүхээ гэгээнээр сийрүүлсэн гэрэлтсэн сэтгэлтэй бүсгүйдээ ирээдүй нь улам тод гялалзахыг хүсье.

С.Ичинхорлоо