Цар тахлыг дотооддоо алдаж, ялангуяа халдварын голомт эмнэлгүүд болж буй нь эрсдэл дагуулж байна. Дайны хажуугаар дажин гэгчээр эрүүл мэндийн салбарынхны үл ойлголцол, дарамт дээгүүрээ бас дунд, доод шатандаа ч үргэлжилсээр байгаа аж. Энэ талаар Цэргийн төв эмнэлгийн лифтчин Д.Мөнх-Эрдэнэтэй ярилцлаа.
-Цэргийн төв эмнэлэгт ямар нөхцөл байдал үүсээд байна вэ. Хүн хүч дутмагаас мэргэжлийн бус хүмүүс ажиллаж байна гэсэн. Бодит байдлыг ярихгүй юү?
-Хүн хүч дутмаг нь худлаа юм. Цэргийн төв эмнэлэг өнөөдөр гэхэд л 600-700 ажилтантай. Хамгийн харамсалтай нь, эмнэлгийн удирдлагууд мэргэжлийн хүмүүсийг томилгоот ажлын байранд нь ажиллуулдаггүй болоод удаж байна. Уг нь ангийн захирагчийн баталсан журмаар бол давхар бүрт эмч, сувилагч, асрагч, тархвар судлаач, ариутгагч гээд таван хүн ажиллах учиртай. Гэвч энэ байдал алдагдсан. Ковидын үед ээлжээр ажиллан өмнө 21, одоо 14 хоног тусгаарлалтад байгаад гарч ирээд ээлжийнхээ дагуу ажлаа үргэлжлүүлдэг. Миний хувьд гэхэд л олон сар ээлжинд гарсангүй, өнөөдрийг хүртэл сул зогсч байна. Хуваарийн дагуу ажилдаа оръё гэхээр оруулдаггүй, өргөдлөө өг. Эсвэл ажлаа хаяад явж болно гэдэг.
-Ямар шалтгаанаар тэр вэ?
-Аймгийн аваргын тэмцээнд ор, үүрэг өглөө гэж оруулчихаад одоо болохоор олон хоног ажил тасалсан гэж хуурамч бичиг баримт бүрдүүлж, цагийн бүртгэлийг хүртэл худлаа зохиож биччихээд дарамтлаад байдаг. Миний хувьд энэ байгууллагад 15 жил ажиллахдаа нэг ч удаа алдаа, дутагдал гаргаж байгаагүй. Нэг ч удаа сахилгын шийтгэл хүлээж байгаагүй. Гэтэл ердөө дээрх шалтгаанаар намайг ажлаа өг, заргалдаад яваарай хэмээн дарамталж байгаад үнэндээ гомдолтой байна.
-Ямар албан тушаалтнууд гэдгийг нэр, устай нь хэлж болох уу?
-Ангийн захирагч хурандаа С.Батболд, Эмнэлэг эрхэлсэн дарга Р.Баянмөнх нар томилгоотой ээлжинд нь хүмүүсийг ажиллуулахгүй хэрнээ огт өөр мэргэжлийн хүмүүсийг ажиллуулаад байдаг. Тухайлбал, ангийн захирагчийн үүдэнд суудаг нарийн бичиг нь нярав хийгээд, сувилагчид асрагч, ариутгагч хийгээд яваад байдаг. Тэд яг мэргэжлийн дагуу хийж чадах уу. Дөнгөж сургуулиа төгссөн хүүхдүүдийг ажиллуулж байгаа бас. Манай нэг лифтчин охиныг дарга нар дарамталж, элдвээр хэлсээр байгаад жирэмсэн байсан зулбасан шүү дээ.
-Цэргийн төв эмнэлгээс хэд хэдэн эмч, сувилагч коронавирусний халдвар авсан. Ер нь орчин нөхцөл, хоол унд ямар байдаг юм бэ. Энэ талын гомдол сонсогдож байсан?
-Хоол хүйтэн ирдэг нь үнэн. Ажилтнууд өөрсдөө ч голоод иддэггүй. Гараас гар дамжин явсаар хөрөлгүй яах вэ дээ. Долоо хоногт ганцхан удаа бямба гарагт эргэлт оруулж байна. Ямар хоригдол биш дээ. Нэг жишээ хэлье. Ковидын үед халдвар хамгааллын дэглэмийг сайтар сахих шаардлагатай. Энэ нь халдвар хамгааллын хувцсыг зөв өмсч, тайлахаас эхэлдэг. Чанарын албанаас 300 гаруй ажилтнаас энэ талын шалгалт авахад ердөө дөрөвхөн хүн тэнцэж байгаа юм. Мөн 125 нь эрсдэлтэй гарсан.
-Танай эмнэлэгт Үйлдвэрчний эвлэл байдаг биз дээ. Энэ байгууллага ажилтнуудынхаа эрхийг хамгаалдаггүй юм уу?
-Байдаг. Гэвч мөнгөөр амаа таглуулчихсан. Тиймээс ажилтнуудынхаа төлөө дуугарах нь бүү хэл харин ч нэмж буруутгах янзтай байдаг.
-Цаашид яахаар төлөвлөж байна вэ?
-Үнэн юм үнэнээрээ байх ёстой. Миний хувьд ямар ч алдаа дутагдал, зөрчил гаргаагүй мөртлөө ээлжийн дагуу томилгоот ажилдаа өнөөдрийг хүртэл орж чадахгүй байна. ЭМЯ, ХЭҮК-т гомдол гаргасан. Гэтэл ХЭҮК нөгөө худлаа бичсэн бүртгэлийг үзчихээд энэ нь танай байгууллагын дотоод асуудал гэсэн агуулгатай хариу өгч байна лээ.
Эрүүл мэндийн салбар ихээхэн барцадтай байна. Салбар нь дэнжигнэж байхад эмнэлгийнхэн нь дотооддоо ийн хагаралдаж, үр дүнд нь жирийн ажилтан хохирч үлдэж байна. Засгийн газраас Ковидын халуун цэгт ажиллаж байгаа ажилтнуудад урамшууллыг олгож, тодорхой хэмжээний нэмэгдэл олгож эхэлсэн. Харин энэ нь эмнэлгийн удирдлагууд дураараа дургиж, мэргэжлийн бус өөрийн хүнээ тавьж, урамшуулал, нэмэгдлийг олгож буй нь харамсалтай.
Эрүүл мэндийн сайд аа, таны хариуцсан салбарт энэ мэт доголдол үүсч, ажил, амьдралаараа олон хүн хохирч байна. Мэдээллийг ил гаргасан нь, бодитоор дэлгэсэн нь Д.Мөнх-Эрдэнэ болохоос бус цаана нь ийм дарамтад хэчнээн хүн байгааг хэлж мэдэхгүй юм.
У.Тэргэл
Сэтгэгдэл (34)