Баянзүрх дүүргийн нэгдсэн эмнэлэг коронавирусний халдварын хамгийн том голомт болоод байна. Өнөөдрийн байдлаар, тус эмнэлгээс голомтлон гарсан тохиолдол 184-т хүрсэн. Хэдийгээр хувийн эзэмшлийнх, хэдхэн хүний хөрөнгө ч гэлээ 360 мянган хүн амтай томоохон дүүргийн иргэдийн эрүүл мэнд, амь насыг эрсдэлд оруулсныхаа хариуцлагыг тус эмнэлгийн удирдлага, ажилтнууд хүлээж таарна. Төр, хувийн гэлтгүй эмнэлгийн удирдлагуудад хариуцлага тооцно гэдгийг ч Шадар сайд Я.Содбаатар мэдэгдсэн билээ.  

Халдвар анх дэгдсэн “Энхсаран” сувиллын захирал, ажилтнууд зэрэг арав гаруй хүнд эрүүгийн хэрэг үүсгэн шалгаж буй.

Хэргийг прокурор хянаад удахгүй шүүхэд шилжүүлнэ гэдгийг холбогдох албаныхан хэлсэн билээ. Цаашлаад төмөр замын, ХӨСҮТ-ийн голомт гээд шалгаж буй юм.

Тиймдээ  ч нийслэлийн нэг дүүргийг цар тахлын томоохон голомт болгоод буй Баянзүрх дүүргийн нэгдсэн эмнэлгийн удирдлагууд, эмч, ажилтнуудыг цагдаагийн байгууллагаас шалгахаар болсон байна.
 

Мөн УОК-оос ажлын хэсэг гарч, тус эмнэлэгт өргөн хүрээний шалгалт хийсэн ба ноцтой олон зөрчил илэрснийг удахгүй мэдээлнэ гэлээ.  

Өдгөө тус эмнэлгийн удирдлагын багт Ерөнхий захирал Б.Даш-яндаг, ТУЗ-ийн дарга Х.Ухнаа, Санхүү, эдийн засгийн асуудал эрхэлсэн захирал, ТУЗ-ийн гишүүн Ж.Энхтайван, ТУЗ-ийн гишүүн Ш.Дэнсмаа, ТУЗ-ийн гишүүн М.Оюунчимэг нар ордог байна.

У.Тэргэл