Цэргийн төв эмнэлэгтэй холбоотой мэдээлэл телевиз болон мэдээллийн сайтаар цацагдсантай холбоотойгоор дараах тайлбарыг гаргаж байна. Лифтчин Д.Мөнх-Эрдэнэ танай сайтад 2020 оны 12 дугаар сарын 27-ны өдөр “Дарга, удирдлагуудын дарамт дор ажлаа хийх боломжгүй болчихоод байна” гэсэн гарчигтай ярилцлага өгсөн байна. Үүнтэй холбогдуулан тайлбар өгье.

Цэргийн төв эмнэлэг нь Батлан хамгаалах салбар, Зэвсэгт хүчний бие бүрэлдэхүүнд эрүүл мэндийн тусламж, үйлчилгээг үзүүлэхийн зэрэгцээ Улсын хэмжээнд эм, химийн бодисын хордлого, галт ба хүйтэн зэвсгийн гэмтэл, Баянзүрх, Багахангай дүүргүүдийн ард иргэдэд мэс засал, хүүхдийн тусламж үйлчилгээг үзүүлдэг тусгай статус бүхий Зэвсэгт хүчний 027 дугаар анги юм.

Улсын онцгой комиссын 2020 оны 02 дугаар сарын 26-ны өдрийн коронавируст халдвар “COVID-19”-аас урьдчилан сэргийлэх ажлыг эрчимжүүлэх тухай тогтоол болон Монгол Улсын Засгийн газрын 2020 оны 178 дугаар тогтоолын дагуу тус эмнэлэгт гадаад орнуудаас ирсэн Монгол Улсын иргэд болон дотоодын халдварын сэжигтэй тохиолдолтой 1600 гаруй иргэдийг тусгаарлан ажиглалт, хяналт, эмнэлгийн тусламж, үйлчилгээг цаг алдалгүй үзүүлэх үүргийг хэрэгжүүлэн ажилласан.

2020 оны 11 дүгээр сарын 22-ны өдрөөс эхлэн Монгол Улсад коронавируст халдвар “COVID-19”-ын батлагдсан тохиолдолтой 453 хүнийг хүлээн авч, эмнэлгийн тусламж үйлчилгээ үзүүлээд байгаа ба 228 хүнийг бүрэн эдгээж, дараагийн шатны тусгаарлалт руу шилжүүлсэн.

Цэргийн төв эмнэлгийн дарга-ерөнхий эмчийн тушаалаар нийт 19 удаагийн ээлжийн бүрэлдэхүүн  “COVID-19”-ийн  тусгаарлалтад орж үүрэг гүйцэтгэсэн байгаа. Өнөөдрийн байдлаар 191 иргэдэд эмчилгээ, үйлчилгээ үзүүлж байна. Халдвартай иргэдийг хүлээн авснаас хойш 200 орчим эмч, эмнэлгийн ажилчид халдвартай хүнд нөхцөлд ядрах, нойргүйдэх, өдөр, шөнийг үл умартан  өргөсөн тангарагтаа үнэнчээр зүтгэж, энэхүү цар тахалтай тэмцэж хичээн ажиллаж байгаа билээ.

Сэтгүүлч лифтчин Д.Мөнх-Эрдэнээс “...хүн хүч дутмагаас мэргэжлийн бус хүмүүс ажиллаж байна гэсэн байсан бодит байдлыг ярина уу гэж асуухад...” хариуд нь ангийн захирагчийн баталсан журмаар бол давхар бүрт эмч, сувилагч, асрагч, тархвар судлаач, ариутгагч гээд 5 хүн ажиллах учиртай гэвч энэ байдал алдагдсан. Эмнэлгийн удирдлагууд мэргэжлийн хүмүүсийг томилгоот ажлын байранд нь ажиллуулдаггүй тухайлбал ангийн захирагчийн үүдэнд суудаг нарийн бичиг нь нярав хийгээд, сувилагч нь асрагч хийгээд, жолооч нь гал тогоонд ажилладаг гэх тайлбар өгсөн байсан.

Тусгаарлалтад ажиллах эмч, сувилагч, эмнэлгийн ажилчдаас ар гэрийн нөхцөл байдал, түүний ажлын болон мэргэжлийн туршлага, хувь хүний халдвар хамгаалал, эрүүл ахуйг сахих чадамж зэргийг судлан, тусгаарлалтад ажиллах зөвшөөрлийг нь авч, ажилтны ажиллах заавар, журам, асуумжийн хуудас зэргийг танилцуулан гарын үсэг зуруулж, холбогдох баримт бичгүүдийг хөтлүүлэн, хэрэгжилтэд нь хяналт тавьж ажилладаг.

Ер нь бол  тухайн давхрын хэвтэн эмчлүүлж байгаа өвчтнүүдийн тооноос хамаарч хэдэн эмч, сувилагч, эмнэлгийн ажилтан ажиллахыг тооцон, ажлын ачааллыг нь тэнцвэржүүлэн, тооцоо, судалгааны үндсэнд томилгоожуулж ажилладаг. Тухайн давхарт ажиллаж байгаа томилгоот албан тушаалтнууд нь өөрийн ажил, үүргийн хуваарийн дагуу давхрын бүхий л эмчилгээ, цэвэрлэгээ, үйлчилгээ, ар талын хангалтын асуудлуудыг хариуцан ажилладаг. Энэ нь шар, улаан бүсүүдэд ажиллаж байгаа эмч, сувилагч, ажилчдыг халдвараас сэргийлж, халдвар хамгааллын дэглэмийг сахиулан ажиллаж байгаа юм.

Тусгаарлах үйл ажиллагаанд хамрагдаж байгаа бие бүрэлдэхүүний хуваарийг гарган батлуулж, батлагдсан хуваарийн дагуу 14-21 хоногийн хугацаатай үүрэг гүйцэтгэж байна.

Өнгөрсөн хугацаанд тусгаарлалтад ажиллаж байгаа бүрэлдэхүүнээс нэмэлтээр хүн оруулах талаар ямар нэг санал, гомдол гаргаагүй болно.

Тус эмнэлэгт жолооч орон тоонд хоёр албан тушаалтан томилгоотой ба тусгаарлалтын үйл ажиллагаанд ээлжлэн орж үүрэг гүйцэтгэж байна. Жолооч нь гаднаас тээвэрлэгдэн ирсэн эм, эмнэлгийн хэрэгсэл, хүнс болон бусад шаардлагатай материал, өвчтөнүүдийн хоолыг эмнэлгийн байрнаас нөгөө эмнэлгийн байр руу автотехникээр тээвэрлэх, өөрийн биеэр зөөвөрлөх ажил, үүргүүдийг гүйцэтгэдэг байгаа.

Байгууллагын жилийн эцсийн эд хөрөнгийн тооллоготой холбогдуулан нярвын албан тушаалд ажилладаг ажилчид маань өөр өөрийн эд хөрөнгийг тоолж баталгаажуулах шаардлагатай байсан учир даргын туслахыг нярваар тусгаарлалтад оруулсан. Даргын туслах албан тушаалтан нь Үндэсний Батлан хамгаалахын их сургуулийг ар талын мэргэжлээр төгссөн бөгөөд тухай үед оны жилийн эцсийн тооллоготой холбогдуулан ар талын хангалтын эд хөрөнгө, хүнсний зарцуулалт, хоолны чанар байдалд хяналт хийх, шаардлагатай эд хэрэгсэлд хяналтын тооллого явуулахаар тушаалын дагуу томилгоожуулж үүрэг гүйцэтгүүлсэн гэх мэт шаардлагатай эмнэлгийн ажилтнуудыг ажиллуулж байна.

Лифтчин Д.Мөнх-Эрдэнэ нь ярилцлагандаа “...армийн аваргын тэмцээнд ор гэж үүрэг өгч оруулчихаад одоо болохоор олон хоног ажил тасалсан гэж хуурамч бичиг баримт бүрдүүлж, цагийн бүртгэлийг хүртэл худлаа зохиож биччихээд дарамтлаад байдаг. Гэтэл ердөө дээрх шалтгаанаар намайг ажлаа өг, заргалдаад яваарай хэмээн дарамталж байгаад үнэндээ гомдолтой байна...” гэсэн байсан.

Тэмцээнд орсон шалтгаанаар ажил тасалсан гэж дарамтлаагүй болно. Лифтчин Д.Мөнх-Эрдэнэ нь 2020 оны 10 дугаар сарын 26-ны өдөр “Ажлаас чөлөөлөгдөх” өргөдлөө өргөдөл, гомдол хариуцсан албан тушаалтанд өгсөн байсан. Өргөдөл өгсөн өдрөөс хойш 10 хоног ажлаа тасалсан. Цагийн бүртгэлийг өдөр бүрийн өглөө, өдөр, орой ажлын цагийг албаны дарга болон ар талын дарга нар бүртгэдэг. Энэ нь байгууллагын хөдөлмөрийн дотоод журамд тусгагдсан хэрэгжүүлэх ажил юм.

 Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх тухай хуулийн 16 дугаар зүйлийн 16.1-т зааснаар /Өргөдөл, гомдлыг хүлээн авсан өдрөөс хойш 30 хоногт багтаан шийдвэрлэнэ. Шаардлагатай тохиолдолд уг хугацааг тухайн байгууллагын удирдах албан тушаалтан 30 хүртэл хоногоор нэмж сунгаж болно. Хугацаа сунгасан тухай өргөдөл, гомдол гаргагчид мэдэгдэнэ/ гэсэн заалтын дагуу Цэргийн төв эмнэлгийн Даргын зөвлөлийн 2020 оны 11 дүгээр сарын 13-ны өдрийн №08 дугаар хуралдаанаас гарсан шийдвэрээр /COVID-19/-ын цар тахлын улмаас үүссэн нөхцөл байдалтай холбогдуулан тодорхойгүй хугацаагаар өргөдөл, гомдлуудыг нээлттэй орхисон. Уг шийдвэрийг өргөдөл, гомдол хариуцсан албан тушаалтан лифтчин Д.Мөнх-Эрдэнэд танилцуулсан.

Лифтчин Д.Мөнх-Эрдэний ажлаас чөлөөлөгдөх хүсэлтэй өргөдлийг шийдвэрлээгүй учир тусгаарлалтад орж ажиллах боломжгүй байгааг өөрт нь мэдэгдсэн болно. Учир нь урьд өмнө нь /COVID-19/-ийн хяналт, ажиглалтын үйл ажиллагаа явуулж байхад лифтчин Д.Мөнх-Эрдэнийг тусгаарлалт руу 2 удаа оруулсан. Одоо бол дотор байгаа нөхцөл байдал хүнд /COVID-19/-ийн халдвар батлагдсан тохиолдлыг авч ажиллаж байгаа тул эрсдэлтэй, нэгэнт ажлаас гарах өргөдлийг шийдвэрлээгүй байгаа учир хойшлуулсан.

Лифтчин Д.Мөнх-Эрдэнэ нь Засгийн газрын “11-11” төвд болон Хүний эрхийн Үндэсний комисст удаа дараа гомдол гаргасан тус байгууллагууд гомдлыг нотлох баримтын үндсэн дээр шалгаад хариуг өгсөн байх, мэдээж үнэхээр тэр хүнд ажлын байрны дарамт шахалт үзүүлсэн үйлдэл нь нотлох баримтаар тогтоогдож байгаа бол эрх бүхий байгууллага шалгах байсан. Мөн Д.Мөнх-Эрдэнэ нь 2019 оны 12 дугаар сарын 27-ны өдөр үндэслэлгүй гомдол гаргаж, хамт олноо өдөөн турхирч, хэд хэдэн ажилтнуудын өмнөөс гарын үсэг дуурайлгаж зурсан асуудал үүсгэж байсан. Уг үйлдэл нь байгууллагын хөдөлмөрийн дотоод журмын ноцтой зөрчлийг зөрчсөн үйлдэл байсан. Дээрх үйлдлүүдэд удирдлагууд нь тухайн хүний ар гэрийн нөхцөл байдлыг бодолцож сахилгын арга хэмжээ авалгүй өнгөрүүлэн өөрт нь анхааруулж хэлж байсан болно. Гэх мэтчилэн үндэслэлгүй худал, хуурмаг мэдээллийг олон нийтийн сүлжээнд тарааж, байгууллагын нэр хүндэд халдаж байна. Энэ асуудлыг хууль хяналтын байгууллагаар шийдвэрлүүлнэ.

Мөн ярилцлагандаа “...манай нэг лифтчин охиныг дарга нар дарамталж, элдвээр хэлсээр байгаад жирэмсэн байсан зулбасан шүү...” гэсэн байсан.

Тэр албан тушаалтан нь лифтчин Л.Уранцэцэг Цэргийн төв эмнэлгийн ар талын хангалт, үйлчилгээний албаны орон сууцны тасгийн лифтчинээр ажилладаг байсан бөгөөд 2020 оны 08 дугаар сарын 19-ний өдрийн дарга-ерөнхий эмчийн Б/223 дугаар тушаалаар өөрийн хүсэлтээр үүрэгт ажлаасаа чөлөөлөгдсөн. Лифтчин Л.Уранцэцэг нь мөн Засгийн газрын “11-11” төвд болон Хүний эрхийн Үндэсний комисст гомдол гаргасан, үндэслэлгүй гэдэг нь тогтоогдсон байгаа.

Энэ олон хүний удаан хугацааны хичээл, зүтгэлийг хэдхэн хормын хугацаанд эмнэлгийн үйл ажиллагаа, эмчилгээ, үйлчилгээ, дотоод орчны нөхцөл байдал, халдвар хамгааллын дэглэмийн талаар ямар ч ойлголтгүй, хариуцлагагүй ажилтны уршгаар үгүй хийж байгаад тус эмнэлгийн эмч, сувилагч, эмнэлгийн ажилчид туйлын харамсаж байна.

Тайлбар бичсэн: Цэргийн төв эмнэлгийн хуулийн офицер, дэслэгч Б.Тамжид.