“Бүхнийг хүүхдийн төлөө” уриатай хандивын тоглолт өчигдөр сүр дуулиантай басхүү хэл амтайхан болж өнгөрөв. Хүүхдийн сайн сайхны төлөө гэх тус үйл ажиллагаанд хүн бүр л сэтгэл зүрхээ зориулж байгаа нь цугларч буй хандивын дүнгээс харагдах. Гэсэн нь тус үйл ажиллагааг 13-хан хоногийн өмнө байгуулагдсан ТББ зохион байгуулсан. Мөн халдвар хамгааллын дэглэм баримтлаагүй, бүх зүйл нь урьдчилан найруулсан тавилттай “жүжиг” байлаа гэдгийг хэлэх хүн олон байна.

За ямар ч байлаа гэсэн монголчууд ирээдүй болсон хүүхэд багачуудынхаа төлөө нэгдэн нийлж чаддаг гэдгийг л эл тоглолт харуулж, тэр чигт олны анхаарлыг хандуулав.

Харин одоо олны дэм, Засгийн газрын дэмжлэгээр сүндэрлэх “Хүүхдийн төв номын сан, Хүүхэлдэй театрын цогцолбор”-ын барилга сүндэрлэж, хөрсөнд дээр буух нь чухал байна.

Эл цогцолборын барилгын газрын асуудал ч өчигдөр тэр дороо шийдэгдсэн. Тодотговол, Нийслэлийн Засаг дарга Д.Сумъябазар цогцолбор барих газрын батламжийг Соёлын сайд С.Чулуунд гардуулж өгсөн юм. Тус батламжинд “Хүүхдийн төв номын сан, хүүхэлдэйн театрын цогцолбор” барихад зориулж Чингэлтэй дүүргийг V  хорооны нутаг дэвсгэрт 11,000 квадрат метр газрын асуудлыг шийдвэрлэн гэрчилгээжүүлэв” хэмээн бичсэн байв. 

Монгол Улсын Ерөнхийлөгч санаачилж, Ерөнхий сайд нь дэмжиж, бүх нийтээрээ “хөдөлсөн” эл ажил хөрсөн дээр бууж гэмээнэ өнөөдөр цахим орчинд шүүмжлэл дагуулаад буй олны хэл ам намжиж, тэд үнэхээр хүүхдийн төлөө байж гэдгийг гэрчлэх болох нь.

Ө.Шижир шинэ жишиг тогтоов

Тоглолтын үеэр олын анхаарлыг татсан басхүү зөв жишиг тогтоох үйлдэл ажиглагдсан. Тодотговол, Ерөнхийлөгчийн Тамгын газрын дарга Ө.Шижир хандивын тоглолтын үеэр “Ажидчдынхаа цалинг хандивлах эсэхийг би шийдэхгүй, өөрсдөөс нь асууна” гээд өөрийнхөө сарын цалинг хандивласан юм. Түүний энэхүү үг, үйлдэл нь маш зөв, үлгэр дууриалал авах жишиг байв. Шуудхан хэлэхэд төрд гарч буй ийм залуус найдвар төрүүлж байгаа юм.

Үнэхээр хэн нэгэн эрх мэдэл албан тушаалтанууд ажилчдынхаа цалинг дур мэдэн хандив нэрээр “хумслах” нь зохисгүй үйлдэл гэдэгтэй маргах хүн ховор биз.  

Дуу хуур, дуулиан шүүмжлэлтэй тоглолтын эхний үр дүн нь шинэ жишиг тогтсон явдал байв. Харин дараа дараагийн үр дүнг ард түмэн чих тавих хүлээж буй гэдгийг энд мөн онцолж байна.  

Б.Баатар