Голомтыг тандан судлах ажлыг өргөн хүрээнд хийж, Баянзүрх дүүргийн нэгдсэн эмнэлэгт үүссэн голомтыг дотооодод нь хумьж байгаа ч гэр бүлээс салбарлаж, дамжсан халдварууд гарсаар байна гэдгийг ХӨСҮТ-ийн Тандалт судлалын албаны дарга А.Амбасэлмаа онцоллоо. Мөн тэрбээр "Вирус маш өндөр агууламжтай байна. Голомтолсон өвчлөлд Улаанбаатар хотод батлагдсан 429 тохиолдлын 3000 гаруй хавьтал байна. Иймд иргэд халдварт өртөх эрсдэл маш өндөр байна. Өнгөрсөн шөнө гэхэд гэр бүлийн гурван хүн халдварт өртсөн нь батлагдлаа. Хаанаас халдвар авсан эх уурхайг судалж байгаа. Тиймээс иргэд сонор сэрэмжтэй байхгүй бол халдвар тархах эрсдэл нэмэгдэж байна. Нөхцөл байдал амаргүй байна. Иргэд амны хаалт зүүж, гэр бүлээрээ цуглахгүй, зочин урихгүй байхыг сануулъя. Хэчнээн уйдсан ч, уламжлал тогтсон ч гэртээ зочин урихгүй байх, хүүхдээ гадаа тоглуулахгүй байхыг анхааруулж байна" гэв. 

Б.Баатар