Сүүлийн өдрүүдэд цахилгааны төлбөрийн бичилт их гарч, төрөөс даана гэсэн ч нэхэмжлэх ирсээр байгаа талаарх мэдээлэл цахим орчинд газар авч, шүүмжлэл дагуулаад байгаа билээ. Тэгвэл Эрчим хүчний сайд Н.Тавинбэх энэ асуудлаар мэдээлэл хийж байна.

Тэрбээр "Монгол Улсын Засгийн газрын шийдвэрээр цахилгаан, дулааны төлбөрийг арванхоёрдугаар сараас 2021 оны долдугаар сарын нэгэн хүртэл төрөөс хариуцахаар болсон. Харин иргэдийн дунд зөрүүтэй ойлголт үүссэн тул тайлбар мэдээлэл өгч байна.

Улаанбаатар хотын хэмжээнд арванхоёрдугаар сард 362,500 хэрэглэгчид бичилт хийсэн. Бүх хэрэглэгчид төлбөрийн мэдээлэл очсон. Үүнээс 4,919 гомдол ирсэн. Тайлбар хариуг тухай бүрт нь өгч, 294 хэрэглэгчийн гомдлыг албан ёсны гомдол болгон шийдвэрлэхээр ажиллаж байна.

Ирсэн гомдлуудыг багцалж үзвэл төлбөр өндөр гарсан, арванхоёрдугаар сарын 1-нээс төлбөрийг төр хариуцаж байхад иргэн төлөхөөр нэхэмжлэл ирсэн гэх асуудал байгаа. Үүний хариултыг би өгье. Айл өрх бүрийн тоолуурын заалтыг манай ажилтнууд биеэр очиж авдаг нүсэр ажил бий. Иймд зургаан хэсэг болгон тоолуурын заалтыг авдаг. Хэрэглэгчийг гэрээ байгуулж, сүлжээнд холбогдсон өдрөөс нь 30 хоногийн хугацаагаар нь тасалбар болгож, хэрэглээний төлбөрийг нэхэмжилдэг. 

Жишээлбэл, иргэн Н.Тавинбэх долдугаар сарын 10-нд гэрээ байгуулсан гэж үзвэл цахилгааны төлбөр нь долдугаар сарын 10-наас наймдугаар сарын 10-ныг хүртэл тооцогдож, наймдугаар сард төлбөр нь гарна. Энэ мэтчилэнгээр тооцвол арваннэгдүгээр сарын 10-наас арванхоёрдугаар сарын 10-нд хэрэглэсэн цахилгааны төлбөр нь арванхоёрдугаар сард гарна гэсэн үг. Өөрөөр хэлбэл, арванхоёрдугаар сард ирсэн төлбөрийн мэдээлэлд нь арваннэгдүгээр сарын тодорхой хоногууд орж ирсэн байгаа. Тэгэхээр өмнөх арваннэгдүгээр сарын төлбөрөө иргэн өөрөө төлж, арванхоёрдугаар сарын төлбөрийг төр хариуцах юм" гэх тайлбарыг өглөө. 

Мөн тэрбээр "Айл өрхүүдийн эрчим хүчний хэрэглээ ердийн үед 1100 МВт байдаг бол шинэ жилийн орой 1300 МВт хүрсэн. Бүх нийтийн бэлэн байдалд шилжсэн мөн шинэ жилийн баяртай холбогдуулан ихэнх аж ахуйн нэгжүүд, үйлдвэрийн үйл ажиллагаа зогссон байсан. Эдгээр аж ахуйн нэгжүүд цахилгаан огт хэрэглээгүй гэсэн үг. Харин энэ үед айл өрхүүдийн эрчим хүчний хэрэглээ 200 МВт-аар нэмэгдэж улсын хэмжээний нийт хэрэглээ 20 орчим хувиар нэмэгдсэн үзүүлэлт гарсан" гэв.

Ташрамд өгүүлэхэд цахилгааны төлбөр нэмэгдээгүй бөгөөд арванхоёрдугаар сараас хойш хэрэглэгчдийн цахилгааны төлбөр гарахгүй гэдгийг албаныхан мэдээллээ. 

Иргэдэд ямар нэгэн гомдол байгаа бол 70047004 дугаарын утсанд гомдол саналаа мэдээлэх боломжтой юм байна.  

Б.Баатар