"Цэс Хайрхан" ХХК-ийн оргилуун дарстай холбоотой асуудал байсхийгээд л олны анхаарлыг татдаг болов. Өгдөөгөөс гурван жилийн өмнө тус компаний үйлдвэрлэдэг "Тансаг" нэр оргилуун дарснаас “Хулгана гарч ирлээ” гэх мэдээлэл цагдаагийн 102 утсанд бүртгэгдсэн байдаг. Тухайн үед үйлдвэрлэгч нар нь “Тансаг нэртэй оргилуун дарсыг үйлдвэрлэхдээ хүний гар оролцуулдаггүй зуун хувь автоматжсан шат дамжлагатай учраас үйлдвэрлэлийн явцад хулгана лонх руу орох ямар ч боломжгүй" гэх тайлбарыг өгч байсан юм. Гэсэн ч дээрх асуудал тэгэсхийгээд нам гүм болж байсан билээ. 

Тэгвэл энэ оны өмнөхөн мөн л "Цэс Хайрхан" ХХК-ийн оргилуун дарстай холбоотой шуугиан дэгдэв.

Тодруулбал, тус компаний үйлдвэрлэдэг "Luxurious" нэртэй оргилуун дарсыг ОХУ-аас импортлон оруулж ирдэг "Советское"-ны шилэнд савласан. Ингэхдээ хаяг шошгыг нь хуулж, угааж цэвэрлэлгүйгээр шууд бүтээгдэхүүнээ савалсан болох бичлэг ил болж, олны дургүйцлийг төрүүлээд байгаа юм.

Тус компаний хувьд дарсны лонхоо урд хөршөөс болон Герман улсаас татдаг авдаг ч цар тахалтай холбоотойгоор шилний хомсдол үүсч, хуучин шилэнд савалсан гэдгээ хүлээгээд буй. Гэхдээ энэ нь цөөхөн тохиолдол хэмээн өөрсдийгөө зөвтгөж буй.

Тэгвэл дээрх үйлдвэр энэ талаараа ямар нэгэн тайлбар хийх, яагаад хуучин хаягийг хуулж цэвэрлээгүй болохыг тодруулахаар тус үйлдвэрийн дугаар утсанд холбогдоход “Бид шаардлагатай бол эргэн холбогдох болно. Одоогоор ямар нэгэн тайлбар, мэдээлэл өгөх боломжгүй байна” гэв.

Үндэсний үйлдвэрлэл гэх цэвэрхэн нэрний ард ийнхүү ард түмнээ “хулихдаж”, шаардлага хангахгүй бүтээгдэхүүнээр шинэ оны “бэлэг” барьж буй нь мэргэжлийн байгууллагууд үүнд анхаарал хандуулах баг болсныг илтгэж байх шиг.

Б.Баатар