Сүүлийн өдрүүдэд халдвар хаанаас авсан нь тодорхойгүй хэд хэдэн голомт үүсээд байгааг ЭМЯ-ныхан хэлж байгаа. Үүний нэг нь автомашины худалдаа, борлуулалтын үйл ажиллагаа эрхэлдэг “Мөнххада” ХХК юм.

Өнгөрсөн оны арванхоёрдугаар сарын 31-ний өдрийн мэдээллээр, тус компанийн хоёр ажилтнаас анх халдвар илэрч, өдрөөс өдөрт нэмэгдсээр өнөөдрийн байдлаар арав гаруй хүн халдвар авсны дотор гэр бүлийнхэн ч байна.

  Тиймээс тус компанийн 116 ажилтнаас шинжилгээ авч, 92 хүнийг тусгаарлаад байгаа юм.

Хатуу хөл хорио тогтоосон энэ цагт эмнэлэг, онцгой, дулаан цахилгаан, , хэвлэл мэдээлэл зэрэг нэн хэрэгцээт 13 салбар үйл ажиллагаагаа явуулж, үлдсэн нь гэрээсээ  ажиллаж байгаа билээ. Гэтэл энэхүү салбарт автомашин худалдаалагч “Мөнххада” ороогүй. Гэтэл ажилчид нь ийн олноороо халдвар авч, голомт болсон нь юутай холбоотой вэ.

“Мөнххада” ХХК-ийн мэдэгдэж буйгаар бол, арванхоёрдугаар сарын 22-ны өдрөөс хойш ямар нэгэн үйл ажиллагаа явуулаагүй гэжээ. Энэ бүгдээс харахад, тус байгууллага үйл ажиллагаа явуулж байхад, тодруулбал, арванхоёрдугаар сарын 22-ны өмнө халдвар ажилчдын дунд тархсан байх нь.

Эс бөгөөс ийн олноороо илэрч байгаа нь ажлаас гадуур ажилтнууд нь бөөнөөрөө цугларсан байж таарна. Хамгийн эрсдэлтэй нь, тус байгууллагын ажилтнуудаас үүссэн голомт хаана вэ гэдгийг тогтоох боломжгүй, хэцүү байгааг ЭМЯ-ныхан хэлж байгаа юм.

Байгууллага нь ийн халдварын голомт болсонд “Мөнххада” ХХК огт эмзэглэхгүй харин ч “Манай байгууллага ажиллаагүй. Тиймээс бидэнд хамааралгүй” гэх утгатай мэдээллийг яаран яаран хийж, асуудлаас зайлсхийж буй нь хэр зохистой вэ.

Түүний оронд нийгмийн хариуцлагаа ухамсарлан  уучлал хүсч, ажилтнуудынхаа амь нас, эрүүл мэндтэй холбоотой асуудлаар ЭМЯ-тай хамтран ажиллах шаардлагатай санагдах юм.

У.Тэргэл