ЭМЯ-наас цар тахалтай холбоотой мэдээллийг өдөр бүр өгсөөр өнөөдөр яг нэг жил буюу 360 хонолоо. Өдгөөгөөс яг нэг жилийн өмнө буюу 2020 оны нэгдүгээр сарын 6-ны өдөр анхны мэдээллээ өгч байлаа. Харин нэг жилийн өмнөхийг өнөөдөртэй харьцуулбал ямар дүр зураг гарах бол.

ЭМЯ-ны мэдээллийг анх иргэд албаны эх сурвалж гэдгээр нь хүндэтгэн чих тавин сонсч, өвчтөнүүдээ эдгээн гаргаж байгаад баярлаж, талархсанаа илэрхийлж, урам өгдөг, дэмждэг байлаа.

Харин өнөөдрийн байдлаар яамны мэдээллийг сонсохоор дархлаа унаад байна гэх болсон. Улиг болсон хэдэн үг хэллэгтэй,  хэдэн тоо л хэлдэг, бөөрөнхийлсөн, сэтгүүлчдийн асуулт авах ч хариулах нь үгүй.

Бурууг ард иргэд рүүгээ чихсэн, олноороо цугларлаа, архидлаа гэж загнасан, гаднын мэдээллээс аль хүнд, хэцүүг нь дурдаж, үүнийгээ өөрийн улстайгаа харьцуулдаг гээд ёс төдий болсон нь үнэний ортой.

Үнэндээ бол, ЭМЯ-ны нэг жилийн ажлыг эргэж дүгнэж болохоор. Анх дэлхийн улс оронд цар тахал дэгдэж, манай улс ч шуурхай арга хэмжээ авсан. Гадаадад буй иргэдээ татан авч, зөөвөрлөгдөн орж ирсэн тохиолдол гарч байсан ч эдгээж, халдварыг барьж чадаж байв. Гэтэл халдварыг дотооддоо алдсанаас хойш жинхэнэ нүүр царай нь ил болж, өнөөдрийн байдлаар улсын, хувийн эмнэлгүүд л жинхэнэ халдварын голомт болоод байна. ХӨСҮТ, Баянзүрх дүүргийн нэгдсэн эмнэлэг, Цэргийн төв госпитал, Хавдар судлалын үндэсний төв,  Ачтан элит эмнэлэг гээд үргэлжилнэ. Цаашлаад Амар, Алтай зочид буудал халдварын голомт болсон ч тэнд ажиллаж байсан эмч, сувилагчид эрүүл ахуйн шаардлага хангадаггүй талаарх тусгаарлалтад буй хүмүүсийн гомдол их.

Халдвар хамгааллын дэглэмийг хамгийн дээдээр сахих учиртай эмнэлгүүд нь өнөөдөр халдварын томоохон голомт болчихоод буй нь юуг хэлээд байна вэ.

Харин ч эсрэгээрээ манай эмнэлгүүд, эмнэлгийн байгууллагууд, эмч, ажилтнуудын үнэн нүүр царайг гаргаж ирэв үү. Халдварт өвчин ихэслээ, В,С вирусийн халдвар ихэсч элэгний өвчлөл нэгдүгээрт явна гэх. Эргээд харахад энэ бүхэн эмнэлгээс үүдэлтэй байсан бус уу гэж бодогдоход хүргэж байна.  Шууд хэлэхэд хүндрэлтэй ч ингэж хэлэх үндэслэл бас харагдаж байна. Н.Алтанхуяг гишүүний хэлсэнчлэн “Энэ халдвар чинь иргэнээс биш, баарнаас биш харин эмнэлгээс чинь илрээд байна” гэдэг юутай үнэн.

Цар тахлаар  олон зүйл илчлэгдэж, үнэн нүүр царай нь илэрч буйн нэг жишээ энэ болж байна. Нэг жилийн өмнөх өнөөдөр, 360 хоногийн дараах өнөөдөр. Энэ хугацааны үйл явдлыг эргүүлэн нэг харж, иргэн та дүгнэлтээ хийнэ биз ээ.

У.Тэргэл