Коронавирус цар тахал Монгол Улсыг төдийгүй дэлхий нийтийг донсолгож, айдаст автуулаад байна. Бүтэн жил гаруйн хугацаанд үргэлжилж буй эл вирусний эсрэг вакцины чимээ одоо л дуулдаж, эхнээсээ хүн амаа хамруулж байна. Харин дэлхий нийт вакцинд бүрэн хамрагдах хүртэл халдвар хамгааллын дэглэм сахих нь хамгийн гол вакцин гэдгийг Дэлхийн Эрүүл мэндийн байгууллагаас анхааруулж, зөвлөж байгаа. Тиймээс ч манай улс дотооддоо халдвар тархсан үеэс эхлэн халдвар хамгааллын дэглэм сахихыг анхааруулж, халдварын голомтоо хумихын тулд хатуу хөл хорио тогтоогоод байгаа билээ.

Гэтэл цөөн хүмүүсийн буруутай үйл ажиллагаа, хэнэггүй зангаас болж халдвар тархсаар, голомт нэмэгдсээр байгаа нь нууц биш.

Монгол Улсад анх халдвар бүртгэгдсэн халдварын голомтыг дөнгөж хумиж байтал Баянзүрх нэгдсэн эмнэлэгт халдварын шинэ голомт үүссэн. Үүний гол буруутан нь тус эмнэлгийн удирдлагууд гэдгийг Шадар сайд Я.Содбаатар нуугаагүй. Тэрбээр “Баянзүрх нэгдсэн эмнэлэг хууль дүрмийн дагуу үйл ажиллагаа явуулж, бүртгэл судалгаагаа үнэн зөв бөглөдөг байсан бол халдвар ингэтлээ тархахгүй байсан” гэдгийг онцолсон.

  Буруугүй "буруутан"

Халдварын голомт болоод байгаа “Мөнххада” ХХК, “Үндэсний цэцэрлэгт хүрээлэн” зэрэг газрууд ч мөн халдвар хамгааллын дэглэм зөрчсөн учраас өдгөө голомт болоод буйг ч Шадар сайд Я.Содбаатар хэлсэн. Тодотговол, дээрх газрууд нь олон хүн цуглуулж, үйл ажиллаагаа явуулсан болох нь тогтоогдсон байдаг.

Ийнхүү том толгой гаргаж, халдвар хамгааллын дэглэм зөрчсөн газрууд буруугаа хүлээж, алдаагаа засахын оронд арьсаа хамгаалж, элдэв мэдэгдэл гаргаж суугаа нь олон нийтийн дургүйцлийг төрүүлж байгаа юм.

Албан байгууллагын лого, бүхий сүжин мэдэгдлүүдэд “Бид буруугүй, халдвар хамгааллын дэглэм зөрчөөгүй” гэх утгатай зүйлсийг сийрүүлж, олон нийтийн сүлжээгээ сэвж байгаа нь дээрх арьсаа хамгаалж байна гэх олны яриаг баталгаажуулж байх шиг.

Тэгвэл халдварын голомт болоод буй “Мөнххада” ХХК-ийн удирдлагууд ямар хүн байдаг талаарх мэдээлэл ч цахим орчинд хөвөрч байна. Тодруулбал, тус компаний үүсгэн байгуулагч нь Мэргэжлийн сумо бөхийн их аварга Хакухо М.Даваажаргал аж.

Харин одоо үйл ажиллагааг нь түүний эгч эрхлэн явуулдаг, үйл ажиллагааг хариуцсан дэд захирал нь Ч.Батзориг гэх хүн байдаг талаарх мэдээлэл байна. Харин албан ёсны мэдээлэл нь нууц байдаг бололтой.

Үндэсний цэцэрлэгт хүрээлэнгийн хувьд ОНӨУҮГ бөгөөд удирдлага нь саяхан томилогдсон Ү.Оюунзул.

"Шинэхэн дээрээ сонихон" гэгчээр түүний удирдаж буй байгууллагаас халдварын тохиолдол илэрсэн тул ийнхүү эмзэг хандаж, мэдэгдэл гаргаж, сүрийг үзүүлж байгаа бололтой. Харин ингэж мэдэгдэл гаргах шаардлага байсан эсэх нь ч эргэлзээтэй.

Угтаа халдвар хамгааллын дэглэм зөрчсөн эсэхийг цаг хугацаа харуулж, хууль хяналтын байгууллага нь тогтоох хойно ийнхүү сүржигнэх хэрэг байв уу. ”Даравч далдай нь булавч бултай нь” гэгчээр ийнхүү мэдэгдэл гэж сүржигнэх нь улам олны анхаарлыг татаж, дургүйцлийг төрүүлж байгаа юм.

Б.Баатар