Эрүүл мэндийн яамны мэргэжлийн салбар зөвлөлөөс мэдээлэл хийлээ. МУИС-ын Физикийн тэнхимийн эрхлэгч Д.Улам-Орших "Коронавирусний халдвар нь хүнээс хүнд халдварладаг өвчин учраас хүн бүр өөрөө өөрийгөө хамгаалах боломжтой.

Халдварын голомтыг хумих хамгийн гол арга нь хөл хорио тогтоох, хүн амыг бөөнөөр нь шинжилгээнд хамруулах явдал гэдэг нь гадны улс орны туршлагаас харагдаж байна. Гэхдээ шинжилгээнд хамруулах арга нь учир дутагдалтай болох нь мөн батлагдсан. 

Манай улс коронавирусний халдварын эсрэг авч байгаа хариу арга хэмжээ үр дүнтэй байгаа. Гэхдээ хөл хорионы чанар эхэндээ сайн байсан ч хоёрдахь удаа авсан хөл хорион дээр чанар нь муудаж байгаа нь судалгаагаар тогтоогдсон. Тиймээс үүнд иргэд анхаарч, хөл хорионы дэглэмээ баримтлах хэрэгтэй байна. Хэрэв энэ чигтээ чанар муудаад байвал өдөрт 20-30 хүнээс халдвар илэрч байгаа тоо 100 хүн болж өсөх магадлалтай.

Коронавирусийг хамгийн хурдан дарах шинжлэх ухааны үндэслэлтэй арга бол хүн бүр гэртээ байх явдал. Харин гэртээ байгаа иргэд өөдрөг хандлагатай байх нь чухал юм. 

Коронавирус нь маш чимээгүй тахал. Учир нь халдвар авсан хүн шинж тэмдэггүйгээр бусдад халдвар тархаах магадлал. Мөн халдвар авсан хүн зарим тохиолдолд шинж тэмдэг илрэхгүй, өвдөхгүйгээр эдгэрч болно. Ойролцоогоор таван хүн тутмын 2-3 хүн нь энэ жишгээр эдгэх, 10 хүнээс 8 хүн нь ханиад хүрсэнтэй адил шинж тэмдэгтэйгээр эдгэх магадлалтай.

Тиймээс иргэд энэ өвчинг ханиаднаас ялгаагүй юм биш үү гэж тайлбарлаад байгаа юм. Гэхдээ энэ нь маш буруу зүйл.

Учир нь халдварын вирус нь цусны даралтыг зохицуулдаг механизмыг гэмтээж, генийн кодыг өөрчилдөг. Тиймээс уушиг, зүрх, бөөр, судасны систем, үржихүйн эрхтэн, хүүхэд багачуудын өнчин тархи, тархи зэргийг гэмтээдэг учир жирийн ханиад биш. 

Жирийн ханиаданд улирал байдаг бол энэ өвчин жилийн турш халдварлаж байдаг. Дэлхий дахинд ч энэ өвчиний эмчилгээг бүрэн олж тогтоогоогүй байна. Тиймээс жирийн ханиад бус цар тахал гээд байгаа юм. Үүнээс хамгаалах хамгийн гол зүйл нь өөрийгөө л хамгаалах явдал юм.

Өвлийн цагт буюу одоо л энэ өвчнийг дарж авахгүй бол хавар хүртэл үргэлжлэх юм бол коронавирусний өөр хувилбар гарч, гэдсийг өвчлүүлдэг, гэдсээр дамжуулдаг хувилбар манай улсад орж ирвэл маш хүнд байдалд орох болно.

Тиймээс энэ хугацаандаа хариуцлагаа өндөрсгөж, хөл хорионы чанарыг сайжруулах нь чухал байна гэдгийг хэлж уриалж байна" гэлээ.

Б.Баатар