Манай улс коронавирусний халдварын дотооддоо алдаад хоёр сар болж байна. Энэ хугацаанд бүх нийтийн бэлэн байдлын зэрэгт хоёр удаа шилжиж, нэг удаа зэрэглэлийн хугацааг сунгажээ. Бүх нийтийн бэлэн байдлын зэрэгт шилжих гол шалтгаан нь халдварын хавьтлыг илрүүлж, голомтыг хумих явдал гэдгийг албаныхан хэлж, тодотгодог билээ.

Улсын Онцгой комиссын дарга, Шадар сайд Я.Содбаатар "Бэлэн байдлын зэрэгт шилжиж, хөл хорио тогтоох зэрэг нь бүгд судалгаа шинжилгээний үндсэн дээр хийгдэж байгаа ажил, түүнээс би дур мэдэн, цагдаж, хориод байгаа зүйл байхгүй" гэдгийг онцолж байсан. 

Улсын Онцгой комиссын дэргэдэх Судалгаа шинжилгээний бүлгийн гишүүдээр дээрх хүмүүс ажилладаг байна.

Тус салбар зөвлөлөөс өнгөрсөн амралтын өдөр мэдээлэл хийж, "Коронавирусийг одоо л дарж авахгүй бол хавар өөр хувилбар гарч, хүнд байдалд орох болно" гэдгийг онцолсон. Харин эдийн засаг хүнд, иргэдийн ахуй амьдрал хэцүү байна гэх шалтгаанаар ямартай ч өнөөдрөөс бэлэн байдлын зэрэглэлийг нэг шат бууруулж, зарим газрын үйл ажиллагаа хэвийн үргэлжлүүлэхээр болов. Гэсэн ч Улаанбаатар хотод халдварын голомт эрчимтэй тархаж байгаа гэдгийг албаныхан сануулж буй.

Тэр ч бүү хэл "Хөл хорионы дэглэмээ баримтлахгүй, чанар нь муудсаар байвал өдөрт 20-30 хүнээс халдвар илэрч байгаа тоо 100 хүн болж өсөх магадлалтай" болох нь судалгаанаас харагдаж байгаа аж. Түүнчлэн коронавирус нь жирийн ханиад бус, цар тахал гэдгийг дээрх судалгаа, шинжилгээний бүлгээс анхааруулсан. 

Энэ талаар Улсын Онцгой комиссын дэргэдэх Судалгаа шинжилгээний бүлгийн гишүүн, МУИС-ын Физикийн тэнхимийн эрхлэгч Д.Улам-Орших "Коронавирусний халдвар нь хүнээс хүнд халдварладаг өвчин учраас хүн бүр өөрөө өөрийгөө хамгаалах боломжтой. Коронавирусийг хамгийн хурдан дарах шинжлэх ухааны үндэслэлтэй арга бол хүн бүр гэртээ байх явдал. Харин гэртээ байгаа иргэд өөдрөг хандлагатай байх нь чухал юм. 

Коронавирус нь маш чимээгүй тахал. Учир нь халдвар авсан хүн шинж тэмдэггүйгээр бусдад халдвар тархаах магадлал. Мөн халдвар авсан хүн зарим тохиолдолд шинж тэмдэг илрэхгүй, өвдөхгүйгээр эдгэрч болно. Ойролцоогоор таван хүн тутмын 2-3 хүн нь энэ жишгээр эдгэх, 10 хүнээс 8 хүн нь ханиад хүрсэнтэй адил шинж тэмдэгтэйгээр эдгэх магадлалтай.

Тиймээс иргэд энэ өвчинг ханиаднаас ялгаагүй юм биш үү гэж тайлбарлаад байгаа юм. Гэхдээ энэ нь маш буруу зүйл.

Учир нь халдварын вирус нь цусны даралтыг зохицуулдаг механизмыг гэмтээж, генийн кодыг өөрчилдөг. Тиймээс уушиг, зүрх, бөөр, судасны систем, үржихүйн эрхтэн, хүүхэд багачуудын өнчин тархи, тархи зэргийг гэмтээдэг учир жирийн ханиад биш. 

Жирийн ханиаданд улирал байдаг бол энэ өвчин жилийн турш халдварлаж байдаг. Дэлхий дахинд ч энэ өвчиний эмчилгээг бүрэн олж тогтоогоогүй байна. Тиймээс жирийн ханиад бус цар тахал гээд байгаа юм. Үүнээс хамгаалах хамгийн гол зүйл нь өөрийгөө л хамгаалах явдал юм.

Өвлийн цагт буюу одоо л энэ өвчнийг дарж авахгүй бол хавар хүртэл үргэлжлэх юм бол коронавирусний өөр хувилбар гарч, гэдсийг өвчлүүлдэг, гэдсээр дамжуулдаг хувилбар манай улсад орж ирвэл маш хүнд байдалд орох болно.

Тиймээс энэ хугацаандаа хариуцлагаа өндөрсгөж, хөл хорионы чанарыг сайжруулах нь чухал байна гэдгийг хэлж уриалж байна" хэмээсэн юм.

Б.Баатар