Засгийн газрын сайд нараас гурвыг нь “сугалах” яриа шинэ он гарсаар улам л идэвхжлээ. Тэднээс Боловсрол, шинжлэх ухааны сайд Л.Цэдэвсүрэнгийн нэр тэргүүнд явна.

Бүх нийтийн хөл хорио тогтоосонтой холбоотойгоор ерөнхий боловсролын болоод их, дээд сургуулиудын хичээлийг цахимаар оруулахаар шийдвэрлэсэн. Гэвч ямар ч үр дүнгүй, хүүхдүүдийг сургах бус залхаах болсныг олон эцэг, эх шүүмжилж ирсэн.

Гэтэл БШУ-ны сайд нь УИХ-д ажлаа тайлагнахдаа “Цахим хичээлд иргэдийн сэтгэл ханамж 80,5 хувьтай байгаа гэсэн “агаар”-ын тоо хэлж, баахан тоон үзүүлэлт харуулж “мэлзэв”. Бодит байдал, сайдын үг хоёр тэнгэр, газар шиг зөрүүтэй гэдгийг захын Должин ч мэднэ.

Хуралдааны үеэр УИХ-ын дарга Г.Занданшатар “Цэдэвсүрэн сайд аа, таны гаргасан шийдвэр ихээхэн хэл ам дагуулж байгаа шүү, Асуултад тодорхой хариул л даа, сэдвээсээ халиад, хазайгаад явчих юм” хэмээн шүүмжлүүлж, эцэстээ БШУ-ны сайд нь хүртэл цахим шинэчлэлээ ойлгохгүй юм гэсэн бухимдлаар төгссөн юм. 

Үнэндээ, цар тахлын энэ үед бүгд л эрвийх дэрвийхээрээ зүтгэж, салбар бүр зохион байгуулалтад орж, ажилласан. Эдгээрээс хамгийн муу менежменттэй, бусдад чирэгдсэн, хоцрогдсон, шүүмжлэл дагуулсан нь боловсролын салбар байлаа.

УИХ-ын гишүүд ч энэ салбарт, ялангуяа бодлогыг нь тодорхойлж байгаа сайдад сэтгэл дундуур байгаагаа илэрхийлж, ийм хүнийг хаанаасаа олж ирээд тавьчихдаг байна гэж дургүйцлээ шууд илэрхийлж байв.  Удирдах зохион байгуулах чадваргүй, салбараа аваад явчих чадамжгүй “жул” ийм нэгэн сайд Засгийн газрын  нэр хүндийг унагаж, улс орны тэргүүлэх салбарыг хөлдөө чирээд байна.

У.Тэргэл