Шүүхийн тухай хуулийн шинэчилсэн найруулгын анхны хэлэлцүүлэг гишүүд, шүүгчдийн үзэл бодлын зөрчилдөөн,  шүүмжлэл дунд болж өнгөрлөө. Ялангуяа шүүгчдийн цалин хөлс, хангамжийг хөндөхөд энэхүү зөрчил илүү хурцадсан юм.

Олон сая төгрөгийн цалинтай, энэ нь жил жилээр шатлалтайгаар өсөөд явна. Дээр нь өвдвөл цалингийнх нь 80 хувьтай тэнцэх хэмжээний мөнгийг сар бүрд тэтгэмжээр авч байх, хагалгаанд орох, гадаадад эмчлүүлэх зэрэгт улс бүхий л зардлыг даах зэргээр хуулийн  төсөлд  тусгасан нь гишүүдийн эгдүүцдлийг хүргэж байв.

С.Амарсайхан гишүүн “Шүүгч ийм хангамж эдлэх юм бол цаана нь өдөр шөнөгүй ард иргэдийн төлөө зүтгэж байгаа онцгой, цагдаа нар яах юм. Тэдэнд бас энэ хэмжээтэй дүйцэхүйц хангамж хэрэгтэй. Тэгээд ч бусад нь барьцдаг юм байгаа биз дээ” хэмээж байв. Төслийн санаачлагч, ажлын хэсгийн ахлагч, УИХ-ын гишүүн Б.Энхбаяр “Шүүгчдийн лобби хүчтэй байна. Гишүүд ээ,  та нарын шүүгчдийн лоббид орохоо болиорой. Хэн гэгч хэний эрх ашгийг хамгаалж, эсэргүүцэж байгааг мэдэж байгаа шүү хэмээн” чуулганы танхимд анхааруулж байв.

Харин шүүгчид “Б.Энхбаяр гэдэг нөхөр нэг ч өдөр хэргийн хавтаст хэрэг уншиж үзээгүй байж юун шүүхийн тухай хуулийг шинэчлэх” хэмээн эсэргүүцлээ далдуур илэрхийлж, шүүгчдийн цалин хангамжтай холбоотой болон насны хязгааргүйгээр шүүгч хийх зүйл заалтыг хэвээр батлуулахаар улайрч байлаа. Харин энэ удаад өнгөрсөн 30 жилд нэг ч шүүгч хариуцлага хүлээж байгаагүй “дархан” заалтыг өөрчилж, шүүх дотор шүүх гэгддэг Сахилгын хороог байгуулсан нь томоохон дэвшил болж байна. 

Энэ мэт эсэргүүцэлтэй тулсан шүүгчдийн цалин хангамж, хамгаалалт, эрүүл мэндийн тэтгэмжтэй холбоотой зүйл заалт гишүүдийн 32:33 харьцаагаар буюу нэгхэн хүний саналаар унаж, шүүгчдийн лобби явсангүй.   

У. Тэргэл