Монгол Улсын Ерөнхийлөгчийн санаачилгаар хоёр оны заагт  “Монгол соёл- монгол хүүхэд- цахим тоглолтыг зохион байгуулсан. Иргэдийн шүүмжлэл, сайшаалыг зэрэг хүртсэн энэхүү тоглолтоос нэг тэрбум төгрөгийн хандив цугларсан тухай мэдээлж байв. Харин хандивлахаар амласан цахим мөнгө блох 6,556 onecoin зоос буюу нэг тэрбум төгрөгтэй тэнцэх хандивыг Монгол Улсын одоогийн хууль тогтоомжид нийцэхгүй.  Хүлээн авч, бүртгэн зарцуулах эрх зүйн орчин манай улсад албажаагүй тул хандивыг хүлээн авах боломжгүйгээ Хүүхдийн төлөө фондоос мэдэгдэн, мэдэгдэл гаргажээ. Үүнд,

МЭДЭГДЭЛ

“Хүүхдийн төлөө фонд”-ыг сэргээн байгуулж, тус санд хөрөнгө бүрдүүлэх зорилгоор зохион байгуулсан “Монгол соёл-монгол хүүхэд” тоглолтын үеэр сангийн үйл ажиллагааг дэмжин хандив өргөсөн иргэн, аж ахуйн нэгж, байгууллагуудад талархал илэрхийлье.

Төвбанк (Монголбанк )-ны тухай хуулийн наймдугаар зүйлийн хоёрдугаар хэсэгт (төгрөгийг орлох төлбөр бусад хэрэгслийг Монголбанкны зөвшөөрлөөр төлбөр тооцоонд хэрэглэх)-ээр хуульчилж, үндэсний төлбөрийн системийн тухай хуулийн дагуу Монгол Улсын мөнгөн тэмдэгт – төгрөгтэй адил үнэ цэнэ бүхий бэлэн бус төлбөрийн хэрэгсэл болох цахим мөнгийг холбогдох байгууллагын зөвшөөрөлтэй нэвтрүүлэхийг зохицуулсан.

Цахим тоглолтын үеэр 1900-1950 оператораар дамжуулан амласан цахим мөнгө болох “6,556  onecoin зоос буюу нэг тэрбум төгрөгтэй тэнцэх” хандивыг  Монгол Улсын одоогийн тогтоомжийн хүрээнд хүлээн авч, бүртгэн, зарцуулах эрх зүйн орчин байхгүй тул дээрх хандивыг хүлээн авах боломжгүй бөгөөд цаашид ч  ийм хэлбэрийн хандивыг хүлээн авахгүй болно” хэмээн тодотгожээ.

Өдгөө дэлхий даяар гурван сая гаруй гишүүн буюу хохирогчидтой уг луйврын сүлжээ нь “Onecoin” гэх хуурамч цахим мөнгийг бусдад зарж, бусдыг элсүүлснийхээ төлөө хувь хүртдэг, пирамид сүлжээ юм. 

У.Тэргэл