Нийслэлийн Өргөө амаржих газар буюу нэгдүгээр төрөх эмнэлэгт амаржсан эхээс коронавирусний халдвар илэрч, тус эмэгтэйг ХӨСҮТ-рүү шилжүүлэв.

Хөхөө өвлийн хүйтэнд дөнгөж амаржсан эхийг эмнэлэгт өмсөж байсан нимгэн халад, гэрийн шаахайтай авч гарч буй элэг эмтлэм бичлэг олон нийтэд ил болсон юм. Үнэхээр харгис дүр зураг. 

Монголчууд төрж амаржсан эхийг гам барьж, дулаан байх ёстой гэлцдэг. Үүнийг ч мэдэхгүй хүн үгүй. Гэтэл ХӨСҮТ-ийн баг нялх биетэй эмэгтэйг идэр есын хүйтэнд шалдан шахуу авч гарч буй нь олон хүнийг дургүйцлийг төрүүлж, бухимдуулав.

Хэлж бус хийсч ирдэг өвчинтэй нүүр тулсан нялх биетэй эмэгтэйд коронавирусний халдвар авснаас илүүтэй энэ харгислал ямар хүнд туссан бол. Ар гэрийнхэнг нь дуудаад ядаж дулаан хувцастай зөөсөн бол, үгүй ядаж эмнэлгийн орны бүтээлэг болтугай ч нөмрүүлээд гаргах сэтгэлтэй хүн тэнд байсангүй юу. Үнэхээр харамсалтай. Сэтгэл дутсан, нүцгэн үнэн тэнд илчлэгдэв. 

Үүний эцэст УОК-ийн дарга Я.Содбаатар өөрийн цахим хуудсаар дамжуулан уучлал хүслээ.

Тэрбээр " Нэгдүгээр төрөх эмнэлэгт амаржсан эхэд халдвар илэрч ХӨСҮТ-д шилжүүлэн тээвэрлэхдээ дэндүү хүнлэг бус харьцсанд УОК- ын даргын хувьд тухайн эмэгтэй болон түүний ар гэрийнхнээс уучлал хүсэж байна. 

Гүйцэтгэл дээр алдаа гаргасан, хүнлэг бус харьцсан холбогдох хүмүүст хариуцлага тооцохыг Эрүүл мэндийн сайдад үүрэг болголоо.

Бид хамтдаа аюулт цар тахалтай тэмцэж байна. Гэхдээ аливаа асуудалд иргэнтэй харьцахдаа хүнлэг ёсоор хандаж , ажилдаа сэтгэлээсээ хандах нь төр түмэндээ тангараг өргөсөн төрийн албан хаагчдын үүрэг гэдгийг ухамсарлах хэрэгтэй.

Хичнээн хүнд амаргүй цаг үед ч гэлээ хүн чанар , хүнлэг ёсыг алдаж болохгүй. Монголчууд бид хамтдаа л энэ цагийг даван гарна. УОК, ЭМЯ холбогдох төрийн байгууллагуудын гүйцэтгэл дээр гарч байгаа болон хүний хүчин зүйлээс шалтгаалсан алдаа гарч байгаад дахин уучлал хүсье. УОК иргэдийн санал бодлыг байнга сонсож ажиллаж байгаа бөгөөд цаашид ч хамтран ажиллана гэдгээ илэрхийлж байна" гэлээ.

УОК-ын дарга Я.Содбаатар "Ниргэсэн хойно нь хашгирав". Гэхдээ хоосон сууж байснаас хоёр үг холбоод уучлалт гуйлаа. Гэхдээ ингээд өнгөрөх бус нялх биетэй эмэгтэйн эрүүл мэнд юу юунаас ч эрхэм гэдгийг анхаарч, түүнд анхаарал хандуулах нь чухал юм.

Ер нь төрийн байгууллагуудын үйл ажиллагаа, тэнд ажиллаж буй хүмүүсийн сэтгэл, зүтгэл ямар хэмжээнд байгаагийн тод илрэл боллоо энэ үйлдэл. 

 Б.Баатар