Баянхонгор аймгийн Өлзийт сумын иргэн М.Зоригт сошиалаар тусламж хүсч, хүүхдүүдээ эрсдэлтэй байдалд байгааг дуулгасан юм. Түүнтэй холбогдож, ярилцлаа.

-Та сошиалд тусламж хүсэн, хүүхдүүддээ тохиолдсон асуудлыг бичсэн байсан. Чухам юу болсон юм бэ?

-Нэгдүгээр сарын 6-ны өдөр бэр маань ярьж, нөхрийн маань шинжилгээний хариу сөрөг гарчихжээ гэхээр нь эмч юм халдвар авчихжээ гэж бодоод л сэтгэл санаагаа тайван байлгаарай  гэсэн. Хүү Мөнгөн гүүр эмнэлэгт ажилладаг. Тэгээд эмнэлэгтээ түргэвчилсэн оношлуураар хоёр  ч удаа шинжилгээ авахад сөрөг гарсан байгаа юм.  Гэтэл ХӨСҮТ-д хэвтүүлчихсэн. Нэгдүгээр сарын 7-ны өдөр хэвтүүлээд 9,10,11-ний гурван өдөр дараалан шинжилгээ өгөхөд мөн л сөрөг гарсан байсан. Мөн томографт  харуулахад уушги нь зүгээр байсан гэсэн. Хүү маань эмч тулдаа шинжилгээ өгье гэж хөөцөлдөж байгаад хэдэн удаа өгсөн байгаа юм. Бүгд л сөрөг гарсан. Гэтэл эмнэлгээс гаргадаггүй. Тиймээс ах нь УОК руу залгахад ХӨСҮТ-ийн ийм хүн мэднэ гээд 8808-тай дугаар өгсөн, шуурхай бүлгийн хүн гэсэн. Тэр хүн тэмдэглэж авлаа. Дарга нартаа дамжуулж хэлээд хариу өгнөө гэсэн. Энэ цагаас хойш УОК, нөгөө хүн нь ч миний дугаарыг огт авахаа больсон. Тиймээс л аргаа ядаад байдлыг бичсэн юм.

-Одоо нөхцөл байдал ямар байгаа вэ?

-Хүүг маань ХӨСҮТ-т авааччихаад, бэрийг маань ажлаас нь тусгаарлана,  битгий гараарай гэж байгаад ажил дээр нь хонуулсан. Гэтэл гэрт нь долоон настай хүү нь ганцаараа. Харин маргааш нь гэртээ харь. Хэн хоно гэсэн юм. Гэрээс чинь очиж авна гэсэн байгаа юм. Бэр маань Баянзүрх дүүргийн эмнэлэгт ажилладаг л даа. Тэгээд гэрээс нь аваад “Амар” зочид буудалд тусгаарлаад байна. Өнөөдрийн байдлаар хүүг маань ХӨСҮТ, бэрийг маань “Амар” зочид буудалд тусгарлаад байгаа.

-ЭМЯ-ны мэдээллээр сэтгүүлч асуухад тийм явдал байхгүй. гурван удаа шинжилгээ өгөөд сөрөг гарсан тохиолдолд гэрт нь гаргана гэж Амбасэлмаа дарга хэлсэн шүү дээ?

-Тэгж байна билээ. Гэтэл ажил, эмнэлэг гээд 6-7 удаа шинжилгээ өгөөд сөрөг гараад байхад яагаад гаргахгүй байгаа юм бэ. Хамгийн гол нь, ах нь эрүүл хүнийг халдвартай өвчтөнүүдтэй хамт байлгаад байна. Халдвар авчихвий гэсэндээ ингээд байгаа юм. Мөн хүүг маань ХӨСҮТ-д 14 хоно, дараа нь Хан-Уулд дахин 14 хоног, дараа нь гэрт нь мөн 14 хоног тусгаарлана гэсэн байна лээ.  Сар гаруй хугацаанд цалингүй байх нь. Бэр маань бас адил. Цалингаараа орон сууц, автомашиныхаа төлбөрийг төлдөг хүмүүс.

-Хүү, бэр хоёр чинь эрсдэлтэй бүсэд ажилладаг юм байна. Тэр хоёроос гадна ажилтнуудыг нь мөн тусгаарласан уу?

-“Мөнгөн гүүр” эмнэлгийн 30-аад хүнийг гэлүү “Амар” зочид буудалд тусгаарласан  дуулдсан. Тэд нь мөн 3-аас дээш удаа шинжилгээ өгөхөд бүгд сөрөг гарлаа гэж байгаа гэсэн.

-Одоо ямар эмчилгээ хийж байна гэнэ. Та холбогдов уу?

-Манай хүүд витамин С, бас лаа өгдөг гэсэн. Лааг ямар учиртай өгдгийг бүү мэд.

- Та холбогдох хүмүүст нь хандан юу гэж хэлэх вэ?

-Хаа хаанаа хариуцлагатай баймаар байна. Анх хүүгээ эмнэлгээсээ халдвар авчээ гэж ойлгосон. Гэтэл сүүлд ХӨСҮТ-т хэвтээд хариу нь олон удаа сөрөг гарахараа юу болоод байнаа гэж бодсон. Халдвартай хүмүүсийн дунд хавчуулаад эрүүл хүнийг хэвтүүлж, хохироогоод байна уу гэсэн хардлага өөрийн эрхгүй төрж байна. Эмчлүүлээд гарсан өвчтөнүүд нь сайн ч хэлэхгүй, муу ч хэлэхгүй байна. Хүүхдүүдтэй минь адил олон хүн байгаа гэж бодож байна. Энэ мэт эргэлзээтэй олон асуудалд холбогдох газрууд болох ЭМЯ, УОК хариу өгөөсэй гэж хүсч байна.

У.Тэргэл