Парламентын түүхэнд хамгийн олон буюу УИХ-ын 54 гишүүний санаачлан боловсруулсан Нөхөн олговор олгох тухай хуулийн төслийг Төрийн байгуулалтын байнгын хорооны хуралдаанаар хэлэлцэхийг дэмжээгүй нь ихээхэн асуудал дагуулах бололтой. Учир нь, Монголын  Бурхан шашинтны төв Гандантэгчинлэн хийдийн тэргүүн хамба Д.Чойжамц эл хуулийн төсөлтэй холбоотойгоор өнөөдөр мэдээлэл хийхээр болсон юм.

Үүнээс Төрөөс бурхан шашин, соёлын биет болон биет бус өв соёлыг сэргээн хөгжүүлэхэд нөхөн олговор олгох хуулийн төслийн цаана хамба Д.Чойжамцын ихээхэн оролцоо байгаа нь харагдаж байна.

Гандантэгчинлэн хийдийн хамба Д.Чойжамц дэлхий дахиныг түгшүүрт автуулаад байгаа цар тахал Монголд тархаж, олон зуун хүн халдварлаж байдал хүнд байхад сүсэгтэн олон, хүн ардынхаа төлөө үг дуугарч, үйлдлээрээ дэмжсэн билүү. Хатуу хөл хорио тогтоосны улмаас олон хүн хоногийн хоолгүй болж, зутарч байхад тэдэнд нэг удаа ч болов гараа сунгасан уу.  Харин тэрбээр энэ хугацаанд 54 гишүүнийг “лоббидож” суусан бололтой. Бурхан шашин, соёлын биет болон биет бус өв соёлыг сэргээн хөгжүүлэх нь улс орны хэмжээнд мэдээж чухал. Даанч цаг үеэ олоогүй, мэдрээгүй гэдэгт л хамаг учир нь байгаа юм.

У.Тэргэл