Дөнгөж төрсөн эмэгтэйд хүнлэг бус хандаж, зөөвөрлөсөн асуудал цахим сүлжээгээр даамжирч, иргэдийн тайван жагсаалын үр дүнд төрийн гүйцэтгэх төв байгууллагын тэргүүн огцорсон. Үүнтэй холбогдуулан МАН-аас дараагийн Ерөнхий сайдад ЗГХЭГ-ын дарга, УИХ-ын гишүүн Л.Оюун-Эрдэнийг нэр дэвшүүлээд буй. 

Тэгвэл МАН-ын бүлгээс нэр дэвшүүлсэн дараагийн Ерөнхий сайдыг өнөөдөр Ерөнхийлөгч  Х.Баттулга УИХ-д оруулах аж. Улмаар УИХ-ын Төрийн байгуулалтын байнгын хороогоор хэлэлцүүлж, чуулганы нэгдсэн хуралдаанаар томилох билээ.

Үндсэн хуулийн 22.3-д "Ерөнхийлөгч Үндсэн хуулийн гучин есдүгээр зүйлийн 2 дахь хэсэгт заасны дагуу Ерөнхий сайдыг томилох саналыг Улсын Их Хуралд анх оруулснаас хойш дөчин тав хоногийн дотор, эсхүл Үндсэн хуулийн дөчин гуравдугаар зүйлийн 1 дэх хэсэгт заасны дагуу Ерөнхий сайдыг огцруулснаас, түүнчлэн дөчин дөрөвдүгээр зүйлийн 2 дахь хэсэгт заасны дагуу Ерөнхий сайдыг огцорсонд тооцсоноос хойш гуч хоногийн дотор Улсын Их Хурал Ерөнхий сайдыг томилоогүй бол Ерөнхийлөгч Улсын Их Хурлыг тараах шийдвэр гаргана",

39.2-д "Улсын Их Хуралд олонхи суудал авсан нам, эвслээс нэр дэвшүүлсэн хүнийг; аль ч нам, эвсэл олонхийн суудал аваагүй бол хамгийн олон суудал авсан нам, эвсэл бусад нам, эвсэлтэй зөвшилцөн олонхийг бүрдүүлж нэр дэвшүүлсэн хүнийг; бусад тохиолдолд Улсын Их Хуралд суудал авсан нам, эвсэл зөвшилцөн олонхийг бүрдүүлж нэр дэвшүүлсэн хүнийг Ерөнхий сайдаар томилох саналыг Ерөнхийлөгч тав хоногийн дотор Улсын Их Хуралд оруулна" гэж заажээ. 

А.Сүх