Ардчилсан намын бүлэг өнөөдөр хуралдаж, дөрвөн асуудал хэлэлцсэн байна. Хэлэлцсэн асуудлын талаар мэдээлэл хийлээ.

УИХ дахь Ардчилсан намын бүлгийн дарга Д.Ганбат "Нэгдүгээрт Ерөнхийлөгчийн Авилгатай тэмцэх тухай хуульд тавьсан хоригийг хэлэлцээд дэмжих боломжгүй гэж үзлээ. 

Харин Ерөнхийлөгчийн санаачилсан ард түмэнд нэг сая төгрөгийн дэмжлэг үзүүлэх тогтоолыг өнөөдрийг хүртэл УИХ-аар хэлэлцсэнгүй. Энэ тогтоол нэн чухал, хэлэлцэх ёстой тогтоол гэж үзэж байна.

МАН коронавирусний цар тахлын үед сандал суудлын хэрүүл хийхээс өөр ажил хийхгүй байна. Гэтэл өнөөдөр ард иргэдийн амьдралыг бодож, Ерөнхийлөгчийн санаачилсан тогтоолын төслийг яаралтай хэлэлцэх хэрэгтэй байна. 

Мөн вакцины асуудлыг яаралтай шийдвэрлэж, чанартай вакцин оруулж ирэх шаардлагатай. Түүнээс энд тэндээс бадар гуйж, чанаргүй вакцин оруулж ирэхийг манай нам дэмжихгүй. 

Түүнчлэн өнгөрсөн долоо хоногт Төв талбай дээр болсон жагсаалыг Ардчилсан нам дэмжиж, Засгийн газар хариуцлага алдсан сайд нартаа хариуцлага тооцох ёстой гэж үзэж байсан. Гэтэл Засгийн газар хариуцлагаас зугтаж, бүрэн бүрэлдэхүүнээрээ огцорлоо. Харицлага алдсан гэж огцорчихоод өнөөдөр Засгийн газрын хэрэг эрхлэх газрын дарга байсан хүнээ Ерөнхий сайдад нэр дэвшүүлж байгаа нь Монголын ард түмнийг доромжилж байгаа хэрэг. 100 жилийн түүхтэй МАН-д өөр энэ албанд томилогдох хүн байхгүй байна гэж үү. Энэ бол доромжлол. Тиймээс Ерөнхий сайдад нэр дэвшиж буй Л.Оюун-Эрдэнийг АН бүлэг дэмжих боломжгүй" гэлээ.

Б.Баатар