УИХ дахь Хууль зүйн байнгын хороо Үндсэн хуулийн цэцийн дүгнэлтийг хэлэлцэж байна. Цэцийн дүгнэлттэй холбогдуулан итгэмжлэгдсэн төлөөлөгчөөс гишүүд асуулт асууж байна.

Ц.Мөнх-Оргил: С.Чинзориг гишүүн ээ. Таны бодлоор үнэхээр хууль зөрчсөн гэж үзэж байна уу. Эсвэл Цэц хуулийн заалтыг буруу тайлбарлачихав уу. 0-3 хүртэлх настай хүүхдээ асарч байгаа эхэд олгох тэтгэмж гэдэг нь хууль зөрчсөн гэж ойлгоод байна. Тэгвэл эх, эцэг хоёрт хоёуланд нь өгнө гэсэн үг үү. Энэ дүгнэлтийг хүлээн зөвшөөрөөд ирэх долдугаар сарын 1-ээс эхлэн олон хүүхэдтэй өрх толгойлсон эцэг, эхэд тэтгэмж олгох бол хэчнээн төгрөг нэмж тусгах хэрэгтэй болчихов оо.

Итгэмжлэгдсэн төлөөлөгч С.Чинзориг: Үндсэн хуулийн 16.11-д улс төр, эдийн засаг, нийгэм соёлын амьдрал, гэр бүлийн харилцаанд эрэгтэй, эмэгтэй тэгш эрхтэй оролцоно гэж заасан. Үүнийг дагаад нэг заалт байгааг зөндөө хэлсэн ч Цэц хүлээж аваагүй. Хүйсээр нь ялгаварласан байна гэдэг дүгнэлт гаргасан. Миний ойлгож байгаагаар 0-3 настай хүүхдээ асрамжилж байгаа эцэг, эх хоёул тэтгэмж авахгүй. Харин эцэг нь хүүхдээ харж байвал эцэгт нь, ээж нь харж байвал ээжид нь зэрэг хүйс харгалзахгүй аль нэгэнд нь олгох эрхийг нээж өгч байна гэж ойлгож байгаа. Жилд 90 тэрбум төгрөгийг 0-3 настай хүүхдээ асарч байгаа эхэд олгож байгаа.

С.Бямбацогт: Хэрэв 0-3 настай хүүхдээ асрамжилж байгаа эцэгт тэтгэмж олгохоор болвол зардал 30 орчим тэрбумаар нэмэгдэхээр байна гэж үзэж байгаа. Энэ бодитой тоо эсэхийг чуулган руу орохдоо тодруулаарай.

Ц.Сандаг-Очир: Үндсэн хуулийн цэцийн дүгнэлттэй санал нэгдэхгүй байна. 2017 онд баталсан хууль Үндсэн хууль зөрчсөн гэж үзжээ. Гэтэл долдугаар сарын 1-ээс хуулийг түдгэлзүүл гэдэг нь ямар агуулга вэ. Энэ хүртэл хуулиа зөрчөөд яв гэсэн үг үү. Үндсэн хууль зөрчсөн гэж үзвэл дүгнэлт гаргасан өдрөөсөө л хуулийн үйлчлэлийг түдгэлзүүлэх ёстой биз дээ.

Итгэмжлэгдсэн төлөөлөгч С.Чинзориг: Энэ бол Цэцийн шийдвэр учраас надад тайлбарлах эрх байхгүй.

Б.Лхам