УИХ-ын ээлжит бус чуулганы үдээс хойшхи хуралдаанаар Монгол Улсын Ерөнхий сайдад нэр дэвшигчийг томилох эсэх тогтоолын төслийг талаар хэлэлцэж байна.

УИХ-ын гишүүн Ж.Батсуурь: Монгол Улсын 32 дахь Ерөнхий сайдад дэвшиж байгаад амжилт хүсье. Монгол Улс сүүлийн жилүүдэд ялангуяа 2016-2024 онд хоёр сонгуулийн цикл  дараалан МАН хамгийн хүчирхэг, ямар ч зүйлийг саадгүй хийх боломжтой байгаа. Гэхдээ та нар намынхаа дэмжлэгээр энэхүү үнэмлэхүй амжилтад хүрсэн. Монголын иргэдийн 50 хүрэхгүй хувь нь та нарыг дэмжиж, саналаа өгсөн. Үлдсэн нь 50 хувь нь дэмжихгүй, өөр бодолтой байгааг бодож байх ёстой. Монголыг цаашид АН, МАН авч явах болно. Түүхэнд та хамгийн хүчирхэг Ерөнхий сайд болж байна. Өмнөх Ерөнхий сайд танхимаа өөрөө бүрдүүлж чадахгүй, саад тотгор их байсан. Өнгөрсөн хугацаанд болсон нийгмийг цочроосон долоодугаар сарын 1-ний,  банкны дампуурал, концесс, Оюутолгой, Тавантолгой, Дубайн асуудалд цэг тавьж чадах уу. Мөн  хөгжлийн багана болсон сөрөг хүчнээ байнга сонсч байгаарай. Та Монгол Улсын Ерөнхий сайд асан У.Хүрэлсүхийн үйл ажиллагааг үргэлжлүүлнэ гэлээ. Төмөр замтай холбоотой асуудлуудыг хэрхэн шийдэх вэ?

Л.Оюун-Эрдэнэ сайд: Баярлалаа. Би улстөржихгүйг хичээнэ. Яагаад гэхээр парламентын засаглалтай учраас  мэтгэлцээн байнга өрнөж байх ёстой. Бодлогын мэтгэлцээн өрнөдөг байгаасай гэж миний хувьд чин сэтгэлээсээ хүсдэг. Тиймдээ ч цөөнхдөө хүндэтгэлтэй хандана. Оюутолгой, Тавантолгой, Эрдэнэттэй  холбоотой мэдээллийг тогтмол өгч байх цаг гаргаж, ажиллана. Бид ойлголтоо нэгтгэх ёстой.  Ингэж байж олон нийтэд ойлголт өгнө. Та бидний хамтын ажиллагаа туйлын чухал. Та бүхэн бурууг шүүмжилж, зөвийг дэмжиж хамтарч ажиллаарай. Төмөр зам, авто замтай холбоотой төслүүдийг хэрэгжүүлнэ. Эн тэргүүнд Гашуунсухайт, Зүүнбаянгийн төмөр зам, тэгээд дараа дараагийнхийг шийдээд явна. Хилийн боомтуудыг холбох асуудлыг нэн тэргүүнд тавина. Томоохон реформ хийх ёстой. Эдийн засгийн хувьд аль салбарт хөрөнгө оруулбал санхүүжилтийн хувьд боломжтой гэдгийг харах ёстой. Эдийн засагчдын үгийг сонсох ёстой. Мөнгө олох салбартаа хөрөнгө оруулж байж энэ хүнд үеийг даван туулах том төслүүдээ ач холбогдлоор нь эрэмбэлнэ. Түүний дагуу санхүүжүүлэх бодлогыг барьж, ажиллана” гэлээ. 

У.Тэргэл