УИХ-ын ээлжит бус чуулганы үдээс хойшхи хуралдаанаар Монгол Улсын Ерөнхий сайдад нэр дэвшигчийг томилох эсэх тогтоолын төслийг талаар хэлэлцэж байна.

Энэ үеэр УИХ-ын гишүүн Б.Энхбаяр үг хэлснийг онцолж байна. Тэрбээр “Манай улсад 2019 оны байдлаар төрийн өмчийн 1150, орон нутгийн өмчийн 4812 нийт 6012 хуулийн этгээд байна. Эдгээрт нийт 240-250 мянган хүн ажилладаг. Энд нийт 19 их наяын эргэлтийн хөрөнгө, 45 их наядын эргэлтийн бус нийт 64 их наядын хөрөнгө бүртгэлтэй байна. Үүнээс 35 их наяд нь өр төлбөр.

Өөрөөр хэлбэл, төрийн байгууллагуудын хөрөнгийн талаас илүү нь өр төлбөр байна.

Миний хувьд төрийн өмчийн хэчнээн байгууллага байгаа талаар Засгийн газраас асуугаад гурван сар боллоо. Мэдэхгүй байна.

Тухайлбал,  Эрдэнэс Тавантолгой компанийн 936 ажилтанд жилд 30 тэрбум, харин урамшуулалд нь 37.9 тэрбум төгрөг өгсөн. Зам тээврийн яамны 20 компани 2019 онд 82.8 тэрбумыг цалингаас гадна урамшуулалд өгсөн.

Мөн төрийн өмчийн ТУЗ-тэй компанид 70 компанид 242 яамны газар, хэлтсийн дарга ажиллаж байна. ЗГХЭГ-ын нэг дарга гэхэд л зургаан компанийн ТУЗ-ийг даргалж байна. Төрийн өмчит компаниудын хууль эрхзүйн орчныг сайжруулах асуудал мөрийн хөтөлбөрт бий. Уг нь төлөвлөгөө ёсоор намрын чуулганаар оруулж ирэх ёстой. Үүнийг яаралтай оруулж ирэх ёстой” гэлээ.

Б.Лхам