УИХ-ын үдээс хойшхи чуулганаар Засгийн газрын гишүүдийг танилцуулж байна. Энэ үеэр ЗГХЭГ-ын даргад нэр дэвшсэн ХЗДХ-ийн сайд асан Ц.Нямдорж “Долоон сарын дараа Засгийн газрын бүрэлдэхүүнд ажиллах санал надад тавиад өнөөдөр энд сууж байна. Шүүх, хуулийн байгууллагаар хянагдаж байгаа хэргүүдийн талаар олон нийт ойлгож өгөхгүй байгаа нэг л асуудал бий.

Энэ нь АТГ-ын дарга, бүх шүүгч, Ерөнхий прокурор түүний орлогч нарыг ХЗДХ-ийн сайд томилдоггүй. Тагнуулын даргыг мөн өөр журмаар шийддэг. Энэ дөрвөн газар хийгдэж байгаа эрүүгийн хэрэг хянан шийдвэрлэх ажиллагаанд Хууль зүйн сайд хөндлөнгөөс оролцох боломжгүй хуулийн заалттай.

Сая АТГ-ын даргын журмыг өөр журмаар томилдог хэлбэрт шилжлээ.

2016-2020 оны хооронд болж өнгөрсөн асуудлаас голчлон хөөцөлдсөн хоёр асуудал байдаг. Нэг нь хууль бусаар шийтгэгдсэн иргэдийн асуудал нь. Нөгөөх нь Эрдэнэтийн 49 хувьтай холбоотой асуудал. Үүний араас хөөцөлдөхөд асар олон бэрхшээл тулгарч байсан нь үнэн. Цаашид Х.Нямбаатар сайд энэ асуудлаар онцгой анхаарах шаардлагатай" гэлээ. 

А.Сүх