Ерөнхий сайд Л.Оюун-Эрдэнэ болон Шадар сайд С.Амарсайхан нар өнөөдөр ОБЕГ-ын үйл ажиллагаатай танилцсан.

Энэ үеэр Ерөнхий сайд Л.Оюун-Эрдэнэ "Өмнө эрүүл мэндийн байгууллага, Онцгой байдлынхантайгаа, Нийслэлийн Онцгой комисс, Улсын Онцгой комисстойгоо хоорондоо тааруу ажиллаж ирсэн. Иргэдтэйгээ олон зүйл дээр хамтарч ажиллах боломж байсан ч энэ боломжийг бүтэн ажиглаагүй. Тиймээс ажлын арга барил, хандлага дээрээ томоохон өөрчлөлт гаргаж, удирдлагын арга барил, менежмент эрс өөрчлөх шаардлага байна гэж үзэж байна" гэдгийг анхаарууллаа.

Энэ талаар тэрбээр "Бид дайны үед ажиллаж, амьдарч байна гэж ойлгох хэрэгтэй. Дэлхийн хоёрдугаар дайнаас хойш хоёр сая гаруй хүний амь насыг авч одсон зүйл нь коронавирусний цар тахал болоод байна. Дэлхий даяараа хүнд байдалд байна. Бид энэ дайнд ялалт байгуулах эсэх нь Онцгой байдлын албан хаагчид та бүхнээс ихээхэн хамаарна.

Бид өнөөдөр сайхан зүйл ярьж, та бүхнийг магтах гэж ирээгүй. Өнгөрсөн хугацаандаа дүгнэлт хийх ёстой гэж энд цугларсан.

Онцгой байдлын алба цас зуд, ган гамшиг зэрэг сайн хариу үзүүлдэг. Гэхдээ өвөлжилт хүндэрнэ гэдэг нэг асуудал. Цар тахал гэдэг бол цогц асуудал юм гэдэг дээр алдаа гаргасан. Цар тахал цогц асуудал учраас шийдэл нь мөн цогц байх ёстой.

Эрүүл мэндийн байгууллага, Онцгой байдлынхантайгаа, Нийслэлийн Онцгой комисс, Улсын Онцгой комисстойгоо хоорондоо тааруу ажиллаж ирсэн. Иргэдтэйгээ олон зүйл дээр хамтарч ажиллах боломж байсан ч энэ боломжийг бүтэн ажиглаагүй. Тиймээс ажлын арга барил, хандлага дээрээ томоохон өөрчлөлт гаргаж, удирдлагын арга барил, менежментийг эрс өөрчлөх шаардлага байна гэж үзэж байна.

Эхний ээлжинд вакцин оруулж ирэх ёстой. Үүний төлөвлөгөөг гаргах хэрэгтэй байна. Мөн өвөлжилт хүндэрч байна. Үүнд бэлэн үү. Сая газар хөдлөлт боллоо. Яагаад Засгийн газарт мэдэгдсэнгүй вэ. Өглөө би утасдаж мэдээлэл авахад хүчний байгууллага нь мэдээгүй байсан шүү генерал аа.

Бид одоо цар тахлыг хөөх бус урьдчилан сэргийлэх ажлыг эдийн засгийн бодлоготой нь цогцоор нь авч хэрэгжүүлэхийг Шадар сайдад үүрэг болгож байна. Ер нь ажлаа ёс зүйтэй хүнлэг хийх ёстой гэдгийг анхааруулъя. Бид өнгөрсөн алдаанаасаа суралцаж ажиллах ёстой. Тиймээс ч дараа дараагийн удаа магтаал бус, шүүмжлэл сонсох болно гэдэг бэлтгэлтэй байгаарай. Бид нэгдсэн нэг мэдээлэл өгдөг байх хэрэгтэй. Мэдээлэл өгдөг хүн нь ч тодорхой байх ёстой" гэсэн юм.  

Б.Баатар