Ерөнхий сайд асан Ж.Эрдэнэбат нарт холбогдох хэргийг Улсын Дээд шүүх  хянан хэлэлцээд анхан болон давж заалдах шатны шүүхийн шийдвэрийг хууль бус гэж дүгнэн, хүчингүй болгож шийдвэрлэсэн билээ. Энэ дагуу  Ж.Эрдэнэбат, Б.Отгонбаатар, Д.Түвшинжаргал нарыг суллах тухай хүсэлтийг өмгөөлөгчид нь Баянзүрх, Сүхбаатар,Чингэлтэй дүүргийн эрүүгийн хэргийн анхан шатны шүүхэд хоёрдугаар сарын 26-ны өдөр гаргасан ч хүлээж аваагүй.

Энэ тохиолдолд өмгөөлөгчид 30 хоногийн дотор  Улсын Дээд шүүхийн Ерөнхий шүүгчид гомдол гаргах эрхтэй байсан юм. Харин гуравдугаар сарын 1-нээс хэрэгжүүлж эхэлсэн Шүүхийн тухай хуулийн өөрчлөлтөөр Эрүүгийн хэрэг хянан шийдвэрлэх тухай хуулийн 40.10 дугаар заалт хүчингүй болсон юм.

Тодруулбал, талууд гомдол гаргах хуулийн заалт хүчингүй болсон учраас хэргийг прокурор руу шилжүүлэх учиртай. Энэ дагуу Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхээс  хавтаст материалыг прокурор руу шилжүүлэхээр гуравдугаар сарын 1-нд албан тоотоор ханджээ.

Хачирхалтай нь, Нийслэлийн прокурорын газар Ж.Эрдэнэбат нарт холбогдох хавтаст хэргүүдийг хүлээн авахаас эрс татгалзаж, бүр Улсын Ерөнхий прокуророос чиглэл ирсэн. Битгий хүлээж аваарай гэсэн” хэмээгээд эрс татгалзжээ.  Хуулийн дээгүүр “гишгэлж”, хэний ашиг сонирхлыг хамгаалан Ж.Эрдэнэбатыг “шоронд” нь хатаах гээд улайраад байгаа юм бэ, Б.Жаргалсайхан прокурор оо! 

Ямартай ч, өнөөдрийн буюу гуравдугаар сарын 3-ны 10.00 цагт  Баянзүрх, Сүхбаатар,Чингэлтэй дүүргийн Эрүүгийн хэргийн анхан шатны шүүхийн шүүгчид өмгөөлөгчдийн хүсэлтээр Ж.Эрдэнэбат нарыг суллах хүсэлтийг дахин хэлэлцэнэ.

Шүүх хүсэлтийг хүлээн авч Ж.Эрдэнэбат нарыг суллах уу, хэргийг хуулийн дагуу Нийслэлийн прокурорын газарт шилжүүлэх үү. Нөгөөдүүл нь “Дээрээс битгий аваарай” гэсэн гээд гүрийгээд суух уу.  Энэ байдал хэдхэн цагийн дараа тодорхой болно.

У.Тэргэл