"Ноёд" группийн Ерөнхийлөгч Г.Буяндоржийн гэр бүл Хонгилын прокуроруудын талаар мэдээлэл хийлээ. Тэд, Улсын Ерөнхий прокурор Б.Жаргалсайханд гурван шаардлага хүргүүлж, албан ёсоор суулт хийж, өлсгөлөн зарлаж буйгаа мэдэгдлээ.

"Ноёд" группийн Ерөнхийлөгч Г.Буяндорж "10 жилийн өмнөөс прокурорын байгууллагад хонгил үүсч би тэрхүү хонгилд орсон хүний хувьд амь насаараа дэнчин тавьж, энэхүү мэдээллийг хийж байна. Одоогоос 10 жилийн өмнө буюу 2011 онд БНХАУ-ын иргэн Шиан Дуны гаргасан гомдлын дагуу надад анх хэрэг үүсгэсэн. Гэтэл энэ хүн 2014 онд Монгол Улсын хилээр гарч явсан байдаг. Харин би 16 удаагийн шүүх хурлаар шүүгдэж, 409 хоног хоригдож, 25 тэрбум төгрөгийн компаниа хураалгасан. Улсын Дээд шүүх надад холбоотой гэх хэргийг хохирогч нь энэхүү БНХАУ-ын иргэн биш болохыг дүгнэсэн. Тиймээс намайг 10 жил ялласан прокуроруудыг шалгуулахаар ёс зүйн хороонд гомдол гаргаж байна.

Мөн намайг анх шүүхэд өгсөн БНХАУ-ын иргэн Шиан Дунтай холбоотой 47 тэрбум төгрөгийн мөнгө угаасан хэргийг шалгуулахаар Нийслэлийн прокурорын байгууллагад өгсөн. Гэсэн ч үүнийг шалгахаас татгалзсан. Энэ нь прокурорын байгууллагад хонгил үүссэнийг нотолж байна. Тиймээс ч Улсын Ерөнхий прокурорт хандаж, албан шаардлага хүргүүлж, 47 тэрбумын хэргийг шалгахыг шаардаж байна. Хоёрдугаарт, 10 жил Г.Буяндоржийн гэх хэргийг нотлож чадахгүй байгаа прокуроруудад ёс зүйн хариуцлага тооцохыг шаардаж байна. Гуравдугаарт, намайг хохироосон 25 тэрбум төгрөгийн хэргийг шүүхэд шилжүүлэхийг шаардаж байна. Эдгээр шаардлагыг биелүүлэх хүртэл манай гэр бүл суулт зарлаж, миний бие өлсгөлөн зарлахаа мэдэгдэж байна" гэв. 

Тэрбээр хонгилын прокуроруудаар Нийслэлийн Прокурорын газрын орлогч прокурор Ц.Батбямба, хяналтын прокурор Ж.Сандагсүрэн, Ц.Батболд, З.Шүрэнчулуун, Ш.Хосбаяр, н.Алдархишиг, Ганбулган, шүүгч С.Батжаргал нарыг нэрлэлээ.

Б.Баатар