Манай улсаас 32 улсад  Элчин сайдын яам, 14-т нь Ерөнхий консулын газар ажилладаг.  Үүнээс 2021 онд хугацаа нь дуусч буй 10, хэтэрсэн долоон орон байгаа бөгөөд нийтдээ 20 орчим Элчин сайдын асуудлыг ирэх хаврын чуулганаар оруулж, шийдвэрлүүлнэ гэдгийг Гадаад харилцааны сайд Б.Батцэцэг хэллээ. Энэ талаар Засгийн газарт танилцуулж, улмаар Ерөнхийлөгчтэй зөвшилцөх учиртай.

Эл асуудлыг яаралтай шийдэхгүй бол олон улсад Монгол Улсын нэр хүнд унаж, нөгөөтэйгүүр, монгол иргэдийн эрх ашиг хохирч буй. Ийнхүү удааширч буй нь Монгол Улсын Ерөнхийлөгчийн эрх ашгийг хөндсөнтэй холбоотой. Тодруулбал, МАН-ын бүлэг Ерөнхийлөгчийн санал болгосон Энэтхэг Улсад суух Элчин сайд Ч.Бүрэнбаярыг хэтэрхий өндөр настай, БНСУ-д суух Онц бөгөөд бүрэн эрхт Элчин сайд Ц.Өнөрзаяаг туршлагагүй хэмээн дэмжээгүй. Үүнээс үүдэн Ерөнхийлөгч УИХ-тай зөвшилцөх саналаа буцаан татсанаар Элчин сайдуудын томилгоо өнөөдрийг хүртэл гацаад буй юм.

Элчин сайдууд улс орны нүүр царай болох мэргэжлийн гэхээс илүүтэй улстөрчдийн ах дүү, хамаатан садан, найз нөхөд томилогддог нь нууц биш. Энэ тухай байнга ярьж, сануулж ирсэн ч зөв гольдролдоо орсон нь үгүй. Харин энэ удаад Элчин сайдад нэр нь яваа эрхмүүд хэн бэ.

-Монгол Улсаас Бүгд Найрамдах Чех Улсад суух Онц бөгөөд Бүрэн эрхт Элчин сайдаар Дамдины Гансүх,

-Монгол Улсаас Бүгд Найрамдах Франц Улсад суух Онц бөгөөд Бүрэн эрхт Элчин сайдаар Батсайханы Болормааг,

-Монгол Улсаас Бүгд Найрамдах Унгар Улсад суух Онц бөгөөд Бүрэн эрхт Элчин сайдаар Бирваагийн Мандахбилэг,

-Монгол Улсаас Бүгд Найрамдах Ардчилсан Солонгос Ард Улсад суух Онц бөгөөд Бүрэн эрхт Элчин сайдаар Маньбадрахын Ганболдыг,

-Монгол Улсаас Бүгд Найрамдах Энэтхэг Улсад суух Онц бөгөөд Бүрэн эрхт Элчин сайдаар Чанравын Бүрэнбаярыг,

-Монгол Улсаас Бүгд Найрамдах Солонгос Улсад суух Онц бөгөөд Бүрэн эрхт Элчин сайдаар Цогтоогийн Өнөрзаяаг,

-Бүгд Найрамдах Киргиз Улсад суух Онц бөгөөд  Бүрэн эрхт Элчин сайдаар Чимэддоржийн  Баттөмөрийг,

-Бүгд Найрамдах Беларусь Улсад суух Онц бөгөөд  Бүрэн эрхт Элчин сайдаар Батсүхийн Баярсайханыг,

-Арабын Нэгдсэн Эмират Улсад суух Онц бөгөөд  Бүрэн эрхт Элчин сайдаар Дамбажавын Ганболдыг тус тус томилох саналыг Засгийн газраас дэмжээд байгаа юм.

 У.Тэргэл