Манай улс өнгөрөгч сарын 23-аас эхлэн тодорхой төрлийн ААН-ээс бусад үйл ажиллагааг нээж, эдийн засгаа эргэлтэд оруулаад буй. Халдвар голомтлон тархаж байгаа нийслэлд 12 хоногийн хатуу хөл хорио тогтоон “Нэг хаалга- нэг шинжилгээ” ажлыг зохион явуулж, эрсдэлт бүлгээ шүүрдсэн. Гэсэн ч халдварын тархалт буурахгүй байгааг өдөр бүрийн Эрүүл мэндийн яамны мэдээллээс харж болно.

Халдвартай иргэдийн ойрын болон дам хавьтлаас халдвар илэрсээр байна. Эмч, мэргэжилтнүүийн зүгээс халдвар нэг ажлын хамт олон болон гэр бүлийн хүрээнээс тархах эрсдэл өндөр байгааг сануулж, олон нийтийн газраар явах бол маскаа давхарлаж зүүх, гараа сайн ариутгахыг анхааруулж байх цаг дор хошин шог, нийтийн дуучид тоглолт хийхээр зэхэж байна. Зарим нь ч тоглоод эхэлсэн.

Хаа хаанаа эдийн засаг хүндрэлтэй, тэд ч орлого олж, өрхийнхөө амьжиргаг залгуулах хэрэгтэй гэдгийг ойлгож байна. Гэхдээ өмнө гарсан сургамж бидэнд бий. “Эмоци” продакшн, “Хар нүдэн” тоглолт үзсэн иргэнээс халдвар илэрч, улмаар халдвартай иргэний ойрын хавьтал болсон иргэдээ олж хайх, илрүүлэх гээд нэгхэсэг л юм болов. Хэчнээн хүнд халдсаныг хэн ч мэдэхгүй.

Тэгвэл халдвар хаана ч байхыг үгүйсгэхгүй, дээр нь дэлхий нийтэд коронавирусний хаврын дэгдэлт болж магадгүй гэж мэргэжлийнхэн сануулсаар байтал төрийн удирдлагуудын буруу шийдвэрээс болж иргэдийн дунд халдвар тархах эрсдэл өндөр болчихоод байна.

Тухайлбал, “Эмоци” продакшн өчигдрөс эхлэн Соёлын төв өргөөнд тоглож эхэллээ. Араас нь дуучин Б.Болд, Х.Мөнгөнцэцэг нар Бөхийн өргөөнд тоглолтоо хийнэ.

Хүүхдүүд нь танхимаар хичээллэхэд эрсдэлтэй байна гэдэг хэрнээ олон мянган иргэн нэг дор цуглаж тоглолт үзэх нь эрсдэлгүй хэрэг үү, Шадар сайд аа.

А.Сүх