УОК-ын зүгээс сэрэмжлүүлэг хүргэлээ.

Засгийн газрын хэвлэл мэдээлэл, олон нийттэй харилцах албаны дарга Ц.Ганзориг "Дэлхий нийтийг нөмөрсөн цар тахал Монгол Улсын хүн бүрийн эрүүл мэнд, амь нас, эдийн засагт аюул учруулсаар байна. Сүүлийн хагас жилийн хугацаанд дотоодод халдвар тархснаас хойш 44 мянган хүн өвчилж, 164 хүн ам насаа алдаад байна.

Дөрөвдүгээр сарын 10-аас тавдугаар сарын 8 хүртэл хөл хорио тогтоосны дүнд мэргэжлийн байгууллагуудын гаргасан судалгаагаар 15 мянган хүн халдварт өртөхөөс сэргийлж нас баралтыг хоёр дахин бууруулсан хэдий ч нөхцөл байдал хүнд байна.

Маргаашаас хөл хориог сулруулж байгаа ч эрсдэл байсаар байна. Тиймээс УОК-аас иргэддээ хандан сэрэмжлүүлэг хүргэж байна.

Тодруулбал, айлд зочлохгүй байх, хүн олноор цуглуулахгүй байх, олон нийтийг хамарсан уулзалт зохиохгүй байх, шаардлагагүй бол гэрээсээ гарахгүй байх, хүн хоорондын зайг цаг ямагт авах, гараа байнга ариутгах, аймаг, нийслэлийн Засаг дарга нар орон хот хооронд иргэдийн зорчуулахгүй байх үүрэг өгч байна. Иргэний үүргээ хариуцлагатай биелүүлж, өөрийн болон дотнын хүмүүсийнхээ амь нас, эрүүл мэндийг хамгаалахыг уриалж байна" гэлээ. 

А.Сүх