Монголын үндэсний олимпийн хорооны дэд ерөнхийлөгч, БТСГ-ын дарга асан, гавьяат дасгалжуулагч Чойжгаваагийн Наранбаатартай ярилцлаа.

-“Токио-2020” зуны олимпийн наадам хэзээ мөдгүй болох нь. Монголын баг тамирчид энэ олимпод өндөр амжилт гаргах зорилго өвөртлөн таван жил чармайлаа. Гэтэл МҮОХ-ны ерөнхийлөгч нь хэл ам таталж, тамга тэмдгээ авч зугтаасан нь даанч харамсалтай. Монголчууд эх орныхоо далбаан дор олимпод орох, эс орох асуудал юу болсон бэ?

-МҮОХ-ны ерөнхийлөгч маань таагүй байдал үүсгэн олон түмний санаа сэтгэлийг тавгүйтүүлж байгаад уучлалт хүсье. Дарга маань хууль хяналтын байгууллагаар шалгуулж байсан ч бид ажлаа тодорхой хэмжээнд явуулсаар ирлээ. Олимп хаяанд ирсээр шийдвэрлэх олон ажил хүлээгдэж байна. Н.Түвшинбаяр ерөнхийлөгч өнгөрсөн сарын 27-ны өдөр ажилдаа орно гэдгээ биеэр хэлээд явсан. Тэр өдөр байгууллагын албан ёсны цахим хаягны нууцлалыг сольжээ. ОУОХ-нд хандаж “ажлаа үргэлжлүүлэх хүсэлтэй” гэсэн утгатай захидал илгээж амжсан байна. Үүний дараа ОУОХ-ноос МҮОХ-ны тэргүүн дэд ерөнхийлөгч Б.Баттүшигт “Энэ хүнийхээ асуудлыг Гүйцэтгэх зөвлөлөөрөө шийдвэрлэхгүй бол ОУОХ-ны Ёс зүйн хороо, Гүйцэтгэх зөвлөлийн хурлаар оруулахаа хэлжээ. Энэ замаар явбал бидэнд хохиролтой. Хэрэв энэ янзаараа байвал тамирчин, дасгалжуулагчдын асуудал, олимпийн наадамд Монголын баг хэрхэн, яаж оролцох нөхцөл байдлыг хэлэлцэж болзошгүй байгаа юм.

-Та бүхэн үүнээс сэргийлж ямар ажил өрнүүлэх вэ?

-МҮОХ-ны Гүйцэтгэх зөвлөлөөс өөрийн дүрмийнхээ “сануулах”, “түдгэлзүүлэх”, “хөөх” гэсэн заалтын дагуу түдгэлзүүлэхээр болсон. Түүнийг ирсэний маргааш нь Гүйцэтгэх зөвлөлийн хурлыг яаралтай хийсэн юм. Н.Түвшинбаяр ерөнхийлөгчид хуралд орохыг уламжилсан ч ирээгүй. Энэ хуралд 11 гишүүн орох ёстойгоос хоёр нь цахимаар, зургаа нь биечлэн оролцлоо. Яг энэ үед Олон улсын үндэсний олимпийн хороодуудын асуудал хариуцсан хүн бидэнтэй цахимаар холбогдож, “танай улсын олимпийн хорооны ерөнхийлөгчийн хийсэн үйлдэл нь МҮОХ-ноос хальж, ОУОХ-ны нэр хүнд, нүүр царайг таагүй болголоо. ОУОХ-ны хартийн 1.4-т байдаг заалтыг нягтлаарай” гэж зөвлөсөн.

-Энэ шийдвэр гарсны дараа “Н.Түвшинбаяр ажилдаа орлоо” гэсэн мэдээлэл гарсан?

-Тэр үнэн. Олон нийтийг төөрөгдүүлсэн мэдээлэл гэж үзэж байна. Үүний дараа Н.Түвшинбаяр ерөнхийлөгчтэй хоёр удаа утсаар холбогдоход “Би ажлаа өгөхгүй гээгүй, өгнө өө” гэж хариулсан. Хүлээж л байна.

-Тамгаа өгөхгүй бол яах вэ?

-Яг тэгвэл цагдаа, АТГ, прокурорын газарт хандахаас өөр аргагүй. Үнэн байдал гэвэл манай байгууллагын тамга байх ёстой газраа байхгүй, ерөнхийлөгч нь дуудахаар ирэхгүй, туслах нь ч алга. Энэ бол хэвийн бус үзэгдэл юм.

-Тамганаас үүдэлтэй ямар чухал ажил хүлээгдэж байна  вэ?

-Ажилтан албан хаагчдынхаа цалинг тавих хэрэгтэй байна. Мөн олимпийн наадамд оролцох хүндэт зочдын асуудал чухал. Хамгийн гол нь олон жил хөлс, хүчээ спортын нэр хүндтэй талбарт гарах гэж зориулсан тамирчдын маань хөдөлмөр талаар болох вий гэж санаа зовниж байна.

-Н.Түвшинбаяр ажлаа өглөө гэхэд дараагийн ерөнхийлөгчийн асуудал сөхөгдөх байх?

-Олимпийн наадмын өмнө энэ тухай асуудал хөндөхгүй болов уу. Тэгж байх цаг нь ч биш. Олимпийн дараа МҮОХ-ны чуулганаа зарлаж, олимпийн хороог цааш хэн удирдахыг шийдэх нь зөв.

-Таныг Монголын спортын салбарыг удирдах он жилүүдэд олимпийн аварга, паралимпын аварга төрөн гарсан. Тив, дэлхийн тэмцээнээс ч олон өндөр амжилтыг тамирчид маань гаргаж байлаа. Энэ удаагийн олимпод манай баг тамирчдаас алтан медаль авах найдвар байна уу?

-Боломжтой. Намайг Биеийн тамир, спортын газрыг удирдах үед “Бээжин-2008” олимпийн наадмаас баг тамирчдаас маань хоёр нь алт, хоёр нь мөнгөн медаль авсан нь хамгийн сайхан дурсамж болон үлджээ. Бас паралимпын наадмаас аваргатай болсон. Мөн өсвөр, залуучуудын олимпийн наадмаас хоёр хүүхэд аварга болсон. Сайхан түүх бүтээжээ. Харин энэ удаагийн олимпийн наадамд Монголын баг тамирчид таваас доошгүй медаль авах байх гэсэн горьдлоготой байна. Бээжингийн олимпийн амжилтыг давтах бүрэн боломжтой.

Б.Жаргал