Неймар Бразилын шигшээгээс зодог тайлж байгаагаа мэдэгдсэн. Тийм ч учраас урд шөнө түүний сүүлчийн ДАШТ, сүүлчийн бүжиг байв. Бразилын шигшээ өнгөрсөн шөнө шөвгийн 16-д Норвегид 2:1-ээр хожигдов. Уг тоглолтод Неймар да силва Сантос Жуниор нэр төрийн гоолоо хийж, шигшээ баг хийгээд ДАШТ-ий дэвжээн дэх замналдаа цэг хатгалаа. Дараа нь тэрбээр "Би хичээсэн... Одоо бүх зүйл дууслаа" хэмээн сэтгэл хөдөлгөм үг хэлжээ. Энэ шөнө зөвхөн нэг тоглогчийн тэмцээн өндөрлөсөнгүй. Нэгэн үеийн мөрөөдөл, Бразилын "№10"-ын нэгэн түүх ч хамт өндөрлөлөө.

Неймар ДАШТ-ий тайзнаа сүүлчийн бүжгээ хийлээ. Тэр аваргын цомыг мөрөөдсөн. Дэлхийн хамгийн авьяастай хөлбөмбөгчдийн нэг байсан ч хувь тавилан түүнд дэлхийн аваргын алтан цомыг атгуулсангүй. Гэмтэл бэртэл, шүүмжлэл, хүлээлт, дарамтыг даван туулсаар тэр дөрвөн дэлхийн аваргад оролцсон ч мөрөөдөл нь биелсэнгүй. Гэхдээ л тэр хэзээ ч бууж өгөөгүй. 

Норвегийн эсрэг тоглолтын төгсгөлд торгуулийн цохилтоор гоолдож, Бразилын итгэлийн сүүлийн очийг асаахыг хичээсэн. Гэвч шүгэл дуугарч, тоглолт дуусахад Неймар нулимсаа барьж чадсангүй. Тэр мөч бол зөвхөн нэг хожигдол биш, бүхэл бүтэн нэг үеийн төгсгөл байлаа. "Би хичээсэн... Би эндээс эхэлсэн, эндээ дуусгаж байна." Ингэж хэлээд тэр Бразилын шигшээтэй өнгөрүүлсэн 16 жилийн замналаа өндөрлөв.

Тэр Бразилын бүх цаг үеийн мэргэн бууч болж, сая сая хүүхдэд мөрөөдөл бэлэглэсэн. Цомоор хэмжигдэхгүй агуу тоглогч гэж байдаг бол Неймар тэдний нэг. Түүнийг зарим нь хэт их жүжиглэдэг гэж хэлдэг байсан. Зарим нь гэмтэл бэртэл нь боломжийг нь хулгайлсан гэдэг. Гэхдээ нэг үнэнийг үгүйсгэх аргагүй. Неймар талбай дээр гарах бүрдээ хөлбөмбөгийг урлаг болгож чаддаг байсан.

Инээмсэглэл, финт, зоригтой хууралт, гэнэтийн дамжуулалт, гайхамшигтай гоолууд... Энэ бүхэн хөлбөмбөгийг үзэсгэлэнтэй болгодог байсныг дэлхий мартахгүй гэдэгт итгэлтэй байна. Баярлалаа, Неймар. Чи дэлхийн аваргын цомыг өргөөгүй байж болох ч олон сая хүний дурсамжид тод хэвээр үлдэнэ. 

Adeus, Neymar. O último samba da Copa terminou.

Л.Баяр