“Улаанбаатар Сонгдо” эмнэлгийн ерөнхий захирал Б.Болдсайхан хүүхдийн вакцины талаар байр сууриа ийнхүү илэрхийллээ. Тэрбээр “Вакцин тариулаад маргааш нь ид шидтэй болоод, гадуураа хуягтай болчихсон мэт бодож болохгүй. Мөн огт өвдөхгүй гэсэн үг биш. Вакцин тариулсан, тариулаагүй бүх хүнд вирус орж ирж байгаа. Дэлхий даяар вакцин хийлгэсэн хүмүүсээс нэлээд өндөр хувь буюу 4-5 хувь нь халдвар авч байгаа. Зарим оронд үүнээс ч өндөр байгаа. Монголд харьцангуй бага.  Азаар Монголын Засгийн газар маш сайн ажилласан. Би иргэн хүнийхээ, эмчийнхээ хувьд Монголын Засгийн газарт, Ерөнхий сайдад, Гадаад харилцааны сайдад, Сангийн сайдад, УОК-т бүгдэд нь талархмаар байна. Монгол баян тарган, чадалтай улс биш. Эдийн засгийн хувьд ч, эрүүл мэндийн системийн хувьд ч тэр. Засгийн газар, Эрүүл мэндийн яам, УОК сайн ажиллаад, иргэд ухамсартай хандаж, вакциндаа сайн хамрагдаагүй байсан бол тархвар судлаачдын тооцоолж байгаагаар, доод тал нь өдөртөө 10-20 мянган хүн өвдөөд, 1000-аас дээш үхэлтэй байх байсан. Бүх эмнэлэг дүүрээд жилийн өмнөх Итали, Герман, Франц, Америк шиг зөвхөн үхэх гэж байгаа хүнээ аппаратад авна. Зарим нь аваад ч нэмэргүй гэдэгтээ тулаад улс даяараа эмгэнэлтэй байдалд байхаар байсан. Хоёр сая хүнээс өдөрт 1300 гэдэг их бага хэмжээ. 0.3 хувь гэсэн үг. Энэ байх ёстой л үзэгдэл. Өвчлөлт бүр алга болохгүй. Тэр байтугай энэ зун, энэ намар алга болохгүй.

Сүүлийн үед хүүхдийн халдвар нэмэгдэж байна. ЭМЯ-ны өгч байгаа мэдээллээр, сүүлийн үед 50,60 хувь нь хүүхдүүд өвдөж байна. Монгол хүүхдийн орон. 16 хүртэлх насныхан нийт хүн амын 30-аад хувь байгаа. Эдгээр хүнд огт вакцин хийгээгүй болохоор халдвар дамжиж байна. Харамсалтай нь, сүүлийн үед хүүхдүүдээ таргалуулдаг болсон. Чихрийн шижинтэй, суурь өвчтэй, дархлааны өөрчлөлттэй хүүхэд их болсон. Засгийн газрыг магтдагийн учир нь, наймдугаар сарын дундуур хичээлийг эхлүүлнэ гэсэн. Түүний өмнө хүүхдүүдээ бүрэн вакцинжуулахаар хамгийн үнэтэй, хүндрэл бага Файзерыг эхнээсээ оруулж ирж байна. 1.3 сая хүүхдээ өвтгөхгүй, хүндрүүлэхгүй, үхүүлэхгүй гэж бодож байгаа бол вакцин хийлгэхээс өөр арга байхгүй. Хамгийн аюулгүй, гайгүй вакцин нь Файзер байгаа. Тиймээс би Засгийн газарт талархмаар байна. Хамгийн түрүүнд би 15 настай хүүдээ хийлгэнэ. Яагаад гэвэл би хүүгээ битгий өвдөөсэй, хүндрээсэй, үхээсэй гэж хүсч байна. Хоёр сая том хүн вакцин хийлгэчихээд яагаад хүүхдүүдээ хамгаалахгүй байгаа юм. Эхнээсээ өвдөөд үхээд байна шүү дээ. Эднийхээ төлөө хамгийн үнэтэй вакцин оруулж ирж байгаад талархмаар байна” гэлээ.