Монгол Улс халдварын тоогоор дэлхийд тэргүүлж, Өмнөговиос бусад аймгууд голомт боллоо. Энгийнээр бол улсаараа улаан бүс болсон гэхэд хилсдэхгүй. Энэ цаг үед наадам хийнэ гэж хөөрцөглөж байхаар түүнийгээ цуцалж оронд нь коронавируст халдварын үед хэрэглэх эм тарианы үнийг хөнгөлөөд өгвөл яасан юм. Эдийн засаг хүндэрсэн энэ үед юу чухал асуудлаа эрэмбэлэх шаардлагатай байна. Өргөн хэрэглээнийхээ бараа бүтээгдэхүүний үнийг тогтворжуулах, махныхаа үнийг бууруулах гээд гол зүйлдээ анхаарлаа хандуулвал яасан юм. Иргэдийн чинь амьдрал үнэхээр хүнд байгааг сонгууль дуусахаар анзаарахаа больчихдог юм уу дарга нар аа!

Мөн наадмыг хойшлуулахыг эрдэмтэн мэргэд ч сануулж, иргэд дэмжиж байгаагаа өөрсдийн цахим хаягаараа дамжуулан илэрхийлсээр байна. 

Тиймээс Үндэсний их баяр наадам, Цагдаагийн 100 жилийн ойн парад гээд олон тэмдэглэлт ойн баяраа түрдээ хойшлуулчих. Эрдэмтдийнхээ үгийг сонсож, нөхцөл байдлаа мэдрэх тийм ухамсар та бүхэнд үлдсэн гэж найдъя. 

Олон нийтийг хамарсан цуглаан болвол арай гэж буурч байгаа халдварын тархалт огцом нэмэгдэнэ гээд Шинэ жил, Цагаан сар, Хүүхдийн баярыг хүртэл хорьсон. Гэтэл намын 100 жилийн ой гээд дүүрэн масктай, маскгүй эрсдэлтэй явсан хүмүүс нь та нар шүү. Дараа нь халдвар огцом нэмэгдсэн. Болохоо байлаа гээд хорьсон. Сая л гэхэд удаан хугацаанд хорьсон хөл хорионыхоо үр дүнг үзээгүй байтал сонгуульдаад горыг нь улсаараа улаан бүс болж "амсаж" байна. Үүний хариуцлагыг хэн хүлээх вэ.

Сүүлийн хэд хоногт нас баралт, халдварын тоо огцом нэмэгдэж байна. Тухайлбал, өчигдөр гэхэд нас баралт наймаар нэмэгдэж, халдварын тохиолдол дахин 2000 давлаа. Энэ бол аюул. Үүнтэй холбогдуулан Эрүүл мэндийн яамнаас Үндэсний их баяр наадмыг цуцлах саналаа гаргаад буй. Уг саналыг иргэд дэмжиж байна. 10 тэрбумаар найр наадам хийснээс илүүтэй иргэдийн амьдрал хүнд байгаа энэ цаг үед бодитой дэмжлэг л хэрэгтэй байна.

А.Сүх