Сүүлийн үед аливаа асуудлын буруутан нь ард түмэн байдаг болжээ. Шатахуун хомсдсон ч, банкнаас мөнгөө алдсан ч бүгд иргэдийн буруу. 

Хэдхэн хоногийн өмнө улсаараа шатахууны хомсдолд орсон буруутан нь иргэд болоод байсан. Тодотговол, Уул уурхай, хүнд үйлдвэрийн сайд Г.Ёндон "Шатахуун хомсдсон нь иргэдийн буруу. Улс шатахууны нөөцтэй байсан ч иргэд их хэмжээгээр худалдан авч нөөцөлсөн. Хөдөө гадаагуур амарч цугаалахаар явахдаа шатахуун их хэрэглэсэн зэрэг нь хомсдол үүсэх шалтгаан болсон" гэх тайлбарыг өгөөд амжсан. 

Гэсэн ч энэ нь түүнийг хариуцлагаас мултлахгүй. Ерөнхий сайд Л.Оюун-Эрдэнэ хариуцлага алдаж, шатахууны хомсдол үүсгэсэн албан тушаалтанд хариулага тооцох үүрэг өгсөн. Тэгэхээр эл асуудалд Г.Ёндон сайдын хэлээд буйчлан буруутан нь иргэд биш учраас албан тушаалтан нь хариуцлага хүлээж таарна. 

Тэгвэл өчигдөр ХААН банкинд данстай иргэд сарын цалингаа, мөн 50 сая хүртэлх төгрөгөө алдсан ноцтой хэрэг гарсаар байгаа талаар мэдээлсэн. Гэсэн нь ХААН банк Г.Ёндон сайдыг үлгэрлэж, бүх бурууг иргэд рүү чиглүүлж орхив.

ХААН банкнаас мөнгөө алдсан иргэд "Бид банканд итгээд мөнгөө хадгалуулдаг. Банк ч үүнээс ашиг олдог. Гэтэл харилцагчдынхаа данснаас мөнгө алдагдаад байхад ямар ч хариуцлага хүлээхгүй байна. Иргэд хохирлоо банкнаас гаргуулахыг шаардаж байна" хэмээсэн.

Гэвч ХААН банкны зүгээс "Залилан хийсэн хүмүүсийн өмнөөс ХААН банк хохирсон иргэдийн мөнгийг нь төлөх боломжгүй. Нууцлалаа хангахыг иргэдэд сануулж байна. Интернет банк шинэчлэгдэж байгаа нь нууцлал алдах эрсдэлээс сэргийлж байгаа хэрэг. Хохирсон иргэдийн санал гомдлыг хүлээн авч, хуулийн зөвлөгөө өгч, залилан хийсэн этгээдийг олох талаар цагдаагийн байгууллагатай хамтран ажиллана.

Зөвхөн манай банкны данстай иргэд мөнгөө алдаад байгаа юм биш. Бусад банкны данснаас мөнгө алдагдаж байгаа. Манай банкны программ доголдлоос үүдэн мөнгө алдагдсан бол хохиролгүй болгоно. Гэхдээ сүүлийн үед хэрэглэгчдийн и-мэйл хаяг, нууц үгийг ашиглан шөнийн цагаар нэвтэрч, мөнгийг нь авч байгаа. Иймд хэрэглэгчдэдээ хандаж хэлэхэд банкны нууцлалаа маш сайн хангахыг зөвлөж байна" гэх тайлбарыг өгөөд буй.

Тус банкны дээрх тайлбараас үзэхэд мөнгөө итгэж хадгалуулсан иргэдийн хохь болж таарах нь. Угтаа банкны хамгаалалтын систем гэж байх ёстой.

Гэтэл харилцагчдынх нь мэдээлэл алдагдаж, мөнгөө алдчихаад байхад ийн бурууг тэдэн рүү чихэж байгаа нь тус банкыг найдваргүй банк гэдгийг тодотгож байх шиг.

Мөнгөө хадгалуул, өндөр хүү өгнө, бид найдартай, хэрэглэгч бол ХААН. Танд ойрхон түмэнд итгэлтэй 30 жил хэмээн сүрийг үзүүлдэг ХААН банкны үнэн төрөх энэ аж. Харилцагчид бол банкны эрхэм зүйл хэмээн тодорхойлсон тус банк мөнгөө алдсан үнэнч харилцагчдаас нүүр буруулж, бурууг тэдэн рүү чиглүүлээд хаяав.

Б.Баатар