Монгол Улсын 2022 оны төсвийн төслийг удахгүй УИХ-ын чуулганаар хэлэлцэнэ. Засгийн газраас өргөн мэдүүлсэн төсвийн төслийн хүрээнд зарим эдийн засагч нар байр сууриа илэрхийлж буй. Тодруулбал, эдийн засаг Ж.Дэлгэрсайхан ирэх оны төсөв тодорхой бодлогын өөрчлөлт, шинэчлэл агуулж чадсанаас гадна халамжаас татгалзаж, хөдөмөр рүү шилжие гэсэн уриалгыг тусгаж чадсан төсөв болсон гэж дүгнэж байгаагаа илэрхийлсэн.

Ирэх оны төсөвт онцлох хэд хэдэн зүйл тусгагдсан. Энэ нь төсвийн хэмнэлтийн бодлого.

2022 оны төсвийн төсөлд төсвийн хэмнэлтийн хүрээнд 100 хувь хэмнэ, 50 хувь хэмнэх зэргээр ангилж, ингэснээр нийт 12.1 тэрбум төгрөг хэмнэх талаар тусгажээ.

Тодруулбал, эрүүл мэнд, онцгой байдал, мэргэжлийн хяналт, гааль, төрийн тусгай чиг үүрэг бүхий байгууллагаас бусад газрын тавилга, зочин төлөөлөгч хүлээн авах, гадаад томилолт, ном хэвлэл, тээвэр шатахуун, сургалт семинар, уралдаан тэмцээн зохион байгуулахад зарцуулж байсан зардлыг 100 хувь хэмнэх бол дотоод томилолт, бичиг хэрэгт зарцуулж байсан зардлыг 50 хувь хэмнэнэ гэжээ.

-Мөн сайд нэгээс илүүгүй туслах, зөвлөхтэй байх, дэд сайд, төрийн нарийн бичгийн дарга дундаа нэг туслахтай байх,

-Төрийн захиргааны байгууллагууд автомашин хэрэглэхгүй, зайлшгүй шаардлагатай бол хувийн хэвшлээс түрээсээр ашиглах,

-Тэтгэвэрт гарсан хоёр алба хаагч тутамд нэг хаагч шинээр ажилд авах,

-Төрийн захиргааны байгууллагын алба хаагчийг ажлын нэг өдөрт нь гэрээсээ цахимаар ажиллах горимд шилжүүлэх,

-Цэвэрлэгээ, засвар  үйлчилгээ, харуул хамгаалалт, дулаан хангамж, хоол үйлдвэрлэлийг хувийн хэвшлээр гэрээний үндсэн дээр гүйцэтгүүлэх,

-Албан контор шинээр барихгүй, тусгай чиг үүрэг гүйцэтгэхээс бусад байгууллага автомашин шинээр худалдан авахгүй,

-Бүх шатны төрийн байгууллагын сургалт, семинар, хурал, зөвлөгөөн зохион байгуулах, алба хаагчийг мэргэшүүлэх, арга хэмжээг цахимаар зохион байгуулахаар тооцож зардлыг тэглэх,

-Төсвийн өхрөнгөөр кино хийхгүй, ой тэмдэглэхгүй, ном хэвлүүлэхгүй, шагнал урамшуулал өгөхгүй,

-Засгийн газрын агентлаг нэгээс илүүгүй дэд даргатай, дарга нь зөвлөхгүй ажиллах ,

-Цахим гарын үсэг нэвтрүүлж банк, даатгал, нотариат, тусгай зөвшөөрөл, хөрөнгө болон эрх өмчлөх, эзэмших, ашиглах, шилжүүлэх, сунгах зэрэг үйлчилгээнд ашиглах хэмээн тусгажээ.

Б.Лхам