УИХ-ын чуулганы баасан гарагийн чуулганы нэгдсэн хуралдаан эхэллээ. Хуралдааны эхэнд Нүүрс тээвэрлэлтийн салбарт Засгийн газраас авч хэрэгжүүлж буй арга хэмжээний талаар сонсож байна.

Т.Доржханд: Өнөөдөр эдийн засгийн нөхцөл байдал хүнд байна. Нүүрсний үнэ түүхэндээ байхгүй өндөр хэмжээнд очиход хоногт 100 орчим л машиныг гаргаж байна. Үүнийг хариуцдаг хүн байхгүй. УУХҮ-ийн сайд, ЗТХ-ийн сайд нь хариуцдаггүй.

Ковид руу буруугаа чихдэг.

Хятадын талаас аймаг, хошуудын даргадаа хэрэв ковид оруулж ирвэл ажилтай чинь ярина гээд өөр системтэй ажилладаг болохоор намдаа олон жил ажилласан хүмүүс албан тушаалаа бодоод ковид-ын тохиолдлыг оруулахгүй гээд чичрээд сууж байна. Гэтэл манайхаас ковид-ын тохиолдол ороод байгаа учраас нүүрсээ зарж чадахгүй байна.

Бид зохион байгуулалттай ажиллаж чадахгүй байна. 500 жолоочийг 14 хоног нэг газар байрлуулаад арайхийн явууллаа гэхэд дундуур нь нэг, хоёр ковид-той хүн шургаад орж байна. Улмаар бизнес, ачаа тээвэр нь ч байдаггүй. Энэ бол цэвэр зохион байгуулалтын ажил. Үүн дээр хэрхэн ажиллах юм бэ.

Хоёрдугаарт, төмөр замын бүтээн байгуулалт байна. Хоёр чиглэлээр зам тавьж байгаа. Хэн гэдэг компанитай гэрээ байгуулсан гэдгээ та нар нууцалсан. УИХ-ын гишүүний хувьд надад өг.

ЗТХ-ийн сайд Л.Халтар: Засгийн газрын шийдвэрээр Цагаан хад суурьшлын бүсийг тодорхой хугацаанд дотоодын цэргээр хамгаалуулсан бүс болгож, зардлыг нь шийдээд явж байна. Одоо зохион байгуулалтын ажил хийнэ. Мөн Цагаан хад суурьшлын бүсэд эмнэлгийн байр түрээслээд вирусний шинжилгээний лабораторио өргөжүүлэх гэж байгаа.

Түүнчлэн төмөр замын талаарх мэдээллийг нууцын журмаар танд хүргүүлье.

Б.Лхам