УИХ дахь Хууль зүйн байнгын хорооны хуралдаанаар УИХ-ын гишүүн Б.Энхбаяр нарын өргөн мэдүүлсэн Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийг хэлэлцэж байна. хуулийн төслийн үзэл баримтлалтай холбогдуулан гишүүд асуулт асуулаа.

Ж.Сүхбаатар: Төсөл санаачлагч өнгөрсөн жил надтай санал солилцож байсан. Шүүхийн урьдчилсан хэлэлцүүлгийн үед буцаах нь зөв. Харин шүүхийн шатанд түргэн шуурхай шийдэх нь зөв гэдэг зарчмаар оруулж ирсэн байна. Өнгөрсөн он жилүүдэд бүх шатны шүүхийн шийдвэр эцсийн байх ёстой гэж ойлгох ёстой. Давж заалдах, хяналтын шат гэдэг бол эрх зүйн үндэслэлийг хянадаг болохоос биш шүүх бүр эцэслэн шийддэг. Шүүх гэдэг бол өөрөө асар том хариуцлага. Дараагийн шатны шүүх байгаа гэдэг зүйлийг халах чиглэл рүү явж байгаа. Монголын шүүх дээр яаж шийдвэрлэсэн нь өөх ч биш булчирхай ч юм шиг байдаг. Гаднын шүүх дээр ойлгомжтой байдаг. Ял завшуулахгүй байх ёстой.

Б.Энхбаяр: Шүүхээс буцсан хэрэг хаачсан бэ. 2019-2021 оны байдлаар шүүхээс буцаагдсан хэргийн 267 хэрэг хэрэгсэхгүй болсон байна. Анхан болон давж заалдах шатны шүүх 267 хүнийг хэрэг хийгээгүй байхад нь ял өгсөн.

Хүнийг хэлмэгдүүлсэн, нийт хэргийг 10 гаруй хувь буюу том тоо.

Хэрэв тэдгээр хүмүүсийг цагаатгасан бол төр уучлал гуйх ёстой. Гэм буруугүй хүнийг хэлмэгдүүлдэг асуудал хэвийн зүйл байж болохгүй шүү дээ. Нэг хүний эрхийг ч болтугай хуулиар хамгаалахын төлөө бид явах ёстой. Хэргийг буцаадаг байдал сүүлдээ мөрдөн байцаагч, прокурор, шүүгч нарыг авлигын сүлжээнд оруулаад байна.

Сүүлдээ бүр “За энэнээс авах юм нь болчихлоо доо. Одоо больчихъё доо” гэж яриа гарсан.

Би хуулийн байгууллагынхны авлигын хэргийг ярьж байна. Прокурор яагаад хэргийг дутуу байхад шүүх рүү явуулаад байна гэхээр шүүхээс чиглэл авах гэж байгаа хэрэг. Гэтэл тухайн хэрэг нотлогдохгүй байхад "чи үүнийг нотлоод ир" гээд прокурор руу явуулаад байдаг. Ийм зарчим дэлхийд байхгүй болсон. Одоо үлдсэн нь ОХУ л байна.

Б.Лхам