Барилгын салбарын үнийн зөрүүг төсөвт суулгаж өгөхийг хүсч, өнөөдөр барилгачид суулт зарлалаа. Тэд Сангийн яамыг төсвийг задаргаагаа эцсийн байдлаар хийх хэрэгтэй гэж үзэж байна. Барилгын салбарынхан цар тахлын хүнд цаг үед сургууль, цэцэрлэгийн барилгыг цаг хугацаанд нь ашиглалтад оруулах гэж байдгаа шавхжээ. Тэдний дунд 300 сая төгрөгийн зээл тавьсан байгууллага олон гэнэ. Тэрбум төгрөгийн зээлтэй компани ч хэд хэд бий гэлээ. Дээр нь нийгмийн даатгал, НӨТ, татварын өр, бусад зээл тэдэнд дарамт учруулжээ.

Энэ асуудал даамжирсаар барилгын салбарын 300 орчим компани, 5000-6000 ажлын байр, 250 мянган өрхийн орлого хүнд байдалд орсон байна.

Барилгын салбарт тулгардаг бас нэг зовлон бол үнийн өсөлт. Өнгөрсөн хугацаанд барилгын бараа, материалын үнэ 2-4 дахин нэмэгджээ. Үүнийг зөвхөн галын шугамд ажиллаж буй хүмүүс л хэлж байна. Тухайлбал, 145 мянган төгрөгийн үнэтэй цемент 300 мянга болтлоо нэмэгдсэн байх юм. Цемент бол барилгын салбарын голлох түүхий эд. Мөн тээврийн зардал өссөн нь тэдэнд дарамт болж. Үнийн өсөлтийн зөрүүг төсөвт суулгах асуудал  Сангийн сайд Б.Жавхлан, Барилга хот байгуулалтын сайд Б.Мөнхбаатар нарын ширээн дээр таг гацжээ. Иймд барилгын салбарынхан олон хүний амь амжиргаанд хүнд тусаж буй асуудлаа шийдүүлж өгэхийг хүсч суулт зарлаж буй билээ. Хэрэв энэ асуудлыг шийдэж өгөхгүй бол огцруулах хүртэл тэмцэнэ гэлээ. 

Б.Жаргал