Рио-Тинто компани Ерөнхий сайдын нэр дээр хаягласан захидалдаа Монголын талын 34 хувийн өрийг 70 хувь хөнгөлөх, нэг их наяд төгрөгийн хөрөнгө оруулах зэргийг санал болгож хариуд нь далд уурхайн бүтээн байгуулалтын зардал хэтрэлтийг нэмэгдүүлж, үйл ажиллагааг урагшлуулах зэрэг дөрвөн санал тавьжээ. Харин манай улсын талаас Монголын талын өрийг багасгасан ч үлдсэн мөнгөн дээр хүү бодогдож явах учраас уг саналыг хүлээн авах боломжгүй бөгөөд задрал хэтрэлтийг дахин нэмэгдүүлэх нь байж болохгүй асуудал гэдэг байр суурийг илэрхийлээд буй. 

Энэ талаар гишүүд өөрсдийн байр суурийг илэрхийлээд байгаа бөгөөд УИХ-ын гишүүн С.Ганбаатар хөрөнгө оруулагч талаас Засгийн газарт удаа дараа захидал илгээж байгаа нь сайны тэмдэг. Хөрөнгө оруулалтын гэрээг улам илүү сайжрулахад ажлын хэсэг анхаарах ёстой гэж үзсэн юм. 

Түүнчлэн УИХ-ын гишүүн Н.Наранбаатар өөрийн цахим хуудастаа "Баялгаа өгчихөөд өртэй үлдэнэ гэж юу байхав. Рио Тинто груптэй цаашид хэлэлцээрийг үргэлжлүүлж хөрөнгө оруулалтын алдагдалтай гэрээнд өөрчлөлт оруулах ёстой. Засгийн газар тогтвортой ажиллаж Оюутолгойн гэрээг Монгол Улсдаа ашигтай байхаар өөрчлөх ёстой.

Засгийн газар Оюутолгойн гэрээг Монголд ашигтайгаар өөрчлөх хэлэлцээрийг Рио Тинтотой хийсний үр дүнд буулт хийх тухай дөрвөн саналыг Монгол улсын Засгийн газарт ирүүлсэн. Үүнд:

Нэгд, Засгийн газрын эзэмшиж буй 34% хувийн хувьцаанд ноогдох зээл 2.3 тэрбум ам.доллар байгаа бөгөөд үүний 70 хувь нь буюу 1.6 тэрбум ам.долларыг ТЭГЛЭХ санал гаргасан байна. Ингэснээр ашиг, ногдол ашиг, ААН-ийн орлогын албан татвар, санхүүгийн тооцооллын хувьд наашлах боломжтой гэсэн байна.

Хоёрт, далд уурхайн бүтээн байгуулалт хойшилсонтой холбогдуулан нэг их наяд төгрөг буюу 350 сая орчим ам.долларын төлбөр өгье.

Гуравт, менежментийн төлбөрийг үе шаттайгаар бууруулья.

Дөрөвт, зардлын хэтрэлтийг нэмж баталж өгөөч, ингэснээр 2022 онд далд уурхайн бүтээн байгуулалтаа дуусгаж, олборлолтын ажлаа эхлүүлэх боломж бүрдэнэ гэдэг саналууд тавьсан байна" гэжээ.