Эрүүл мэндийн яамнаас долоо хоног бүрийн баасан гарагт коронавирусний халдварын нөхцөл байдал болон, хэрэгжүүлж байгаа арга хэмжээнийхээ талаар мэдээлэл өгдөг. Өнгөрсөн долоо хоногийн мэдээллийн үеэр НЭМГ-ын орлогч дарга Ж.Отгонболд "Монгол Улс цар тахлын үед нэг иргэндээ 111 сая төгрөг зарцуулсан гэсэн тооцоо гарсан" гэж хэлсэн нь олныг бухимдуулаад буй. Гэвч өчигдөр Эрүүл мэндийн сайд С.Энхболд "Ам нээвэл" нэвтрүүлэгт орох үеэрээ дэд даргынхаа мэдэгдлийг үгүйсгэсэн юм.

Тэрбээр "Өнгөрсөн баасан гарагийн 11.00 цагийн мэдээллээр НЭМГ-ын дэд дарга ташаа мэдээлсэн. Одоогоор нэг ч хүн дээр 111 сая төгрөгийн эмчилгээний зардал гараагүй байна. Тэгээд ч тухайн өвчтөний биeийн байдал, эмчилгээний явц, хэрэглэх эм тариа нь харилцан адилгүй. Гэхдээ ЭМД-ын ҮЗ-ийн тогтоолоор сэхээн амьдруулах тасагт хэвтэж байгаа хүнд өвчтөнд 4 сая 300 мянган төгрөгийн эмчилгээ хийхээр заасан. Анх Францын иргэнийг 51 хоног эмчлэх үeд эм тариа нь ховор, үнэтэй, эмчилгээ нь тодорхой бус, олон эмч ажилтнуудын хамгаалах хэрэгсэл гээд 8 сая төгрөгийн зардлыг тооцсон" гэдэг тайлбарыг өгөв. 

Үүнээс иргэдийн дунд дэд дарга нь тоо алдаж хэлэв үү, эсвэл хэлэх ёсгүй мөнгөн дүнг хэлэв үү хэмээх эргэлзээ бий болоод байна. 

Дэлхий дахинд цар тахал дэгдсэн энэ хугацаанд гадна, дотноос бишгүй тусламж ирсэн. Мөн манай улс нэг жилийн хугацаанд нэг тэрбум ам.долларын зээл аваад байгаа бөгөөд үүний зарцуулалт нь тодорхойгүй байна хэмээн УИХ-ын гишүүн Н.Алтанхуяг чуулганы индрээс шүүмжилж байсан удаатай. Тиймээс энэ хугацаанд эрүүл мэндийн салбарт хэдэн төгрөгийг яаж зарцуулсан талаараа ил тод тайлагнахыг иргэд хүсэж байна сайд аа. 

А.Сүх