Ирэх оны төсөвт Хэнтий аймгийн Өндөрхаан суманд "Өндөрхаан" нисэх буудлыг ашиглалтад оруулахаар 9.9 тэрбум төгрөг төсөвлөжээ. Кувейтын хөрөнгө оруулалтаар энэ ажил хийгдэнэ гэв. Мөн тус аймгийн Дадал суманд "Дэлүүн болдог" нисэх буудлыг барихад зориулж, таван тэрбум төгрөг төсөвлөсөн байна. Тухайлбал, ирэх онд "Өндөрхаан", "Дэлүүн болдог" зэрэг нисэх буудал барина гэлээ.

Нисэх буудал барих ч яамай байна. Тус аймгийн төв Чингис хотоос Бэрх тосгон хүртэлх 70 км зам засварын ажил хэзээ дуусах вэ. Иргэд шороон замаар тоос татуулсаар олон намартай золголоо. Юун түрүүнд Бэрх тосгон хүртэлх автозамаа хугацаанд нь ашиглалтад оруулбал их юм болох гээд байна. 

Бэрх хүртэл баригдах замын эхний 20 км автозамыг “Наранбулаг-Хан”, “Анандын зам” компани хамтран 2019 онд ашиглалтад оруулсан билээ. Үүнээс хойш дорвитой ажил хийгдсэнгүй. Цаашлаад Дадал сум хүртэл зам тавина гэж дуулдсан. Түүнд хүрэх хол байна. Эхний 20 км замаа барьж дууссаны дараа УИХ-ын сонгууль, Орон нутгийн сонгууль, Ерөнхийлөгчийн сонгууль, Нөхөн сонгууль гээд дөрвөн сонгуулийн нүүр үзлээ. Эрх баригч нам ялсаар л байгаа. Гэвч замын ажил дорвитой явсангүй.

Хэнтийгээс сонгогдсон эрхэм гишүүд маань нэгийг бодох байгаа. Сонгууль дууслаа, хэзээ Бэрхийн замын ажил дуусах бол.

Энэ он удаан жил барьж буй автозамаа дуусгаагүй байж хоёр нисэх буудал барина гэдэг ч төсөөллөөс хол сонсогдож байна.

Б.Жаргал