Оюутолгойн ажлын хэсгийн ахлагч, ХЗДХ-ийн сайд Х.Нямбаатар мэдээлэл өглөө.

Тэрбээр “Рио-Тинто компаниас Засгийн газарт дөрвөн санал тавьсан тухай мэдээлэл өгсөн. Энэ хүрээнд өчигдөр хөрөнгө оруулагч талтай уулзсан. Засгийн газарт тавьсан дөрвөн саналд төдийлөн сэтгэл хангалуун биш байна. Хөрөнгө оруулалтын гэрээнд тодорхой өөрчлөлт оруулахаас нааш энэ хэлэлцээр цааш үргэлжлэх боломжгүй байгааг маш тодорхой илэрхийлсэн.

Хэлэлцээр маргааш үргэлжилнэ.

Хэлэлцээрийн явцад яригдсан зарим асуудлын талаар дэлгэрэнгүй ярихгүй байх талаар зөвлөлдсөн. Хамгийн гол наашилж байгаа нэг асуудал нь Тавантолгойн цахилгаан станцын санхүүжилтийг босгохуйц эрчим хүч тогтвортой худалдан авах гэрээнд талууд арваннэгдүгээр сарын 7-нд багтаж гарын үсэг зурахаар төлөвлөсөн. Тохиролцоогүй ганц хоёр асуудал бий. Үүнийг үлдсэн хугацаанд шийднэ.

Хөрөнгө оруулагч талаас хүсэж байгаа зүйл нь далд уурхайн бүтээн байгуулалтын ажлыг зогсоомооргүй байна. Бид тодорхой хэмжээгээр буулт хийж байна.

Тиймээс 1.4 тэрбум ам.долларын зардлын хэтрэлт дээр Монголын талаас зөвшөөрөл олгооч.

Энэ тохиолдолд эхний ээлжинд 700 сая ам.доллараас нэг тэрбум ам.долларыг Төв банк руу шилжүүлэхэд бэлэн байна. Ингэснээр далд уурхайн бүтээн байгуулалтын ажлаа ирэх онд ашиглалтад оруулах шаардлагатай их хэмжээний хөрөнгө оруулалт орсон. Далд уурхай болон ил уурхай зэрэг үйл ажиллагаагаа явуулахаар энэ компанийн санхүү сайжирна. Цаг алдмааргүй байна гэдэг саналыг аль аль талаас өгсөн. Манай талаас Арбитрт хандсан сөрөг нэхэмжлэлээ татахгүй гэдгээ хэлсэн" гэлээ.

А.Сүх